Кугу Отечественный сар пагытыште совет салтак веле огыл, фашист-влакын оккупироватлыме кундемлаштат миллион дене мемнан гражданна-влак пытеныт. Ятырыштым: изимат, кугумат, шоҥгымат, пӧръенымат да ӱдырамашымат индырен пуштмо. Шуко еҥым Германийыш кул шотеш виеш наҥгайыме. Пеш шукын шужен, кылмен да черланен коленыт. Кызыт шотлен лукмо статистике почеш, тыгай еҥже 23 миллион утла погына. Шуко оккупироватлыме областьласе жертве мыняр лийме нерген але тачат чын цифре уке.
Марий Кугыжаныш университетын историй да филологий факультетыште ыштыме «Воскресение» 20 наре еҥан поисковый группо тиде пашаште, да тиде статистикым чыныш кондымаште кугу надырым пышта. Таче республикысе художественный галерейыште кушто лиймышт да суапле пашашт нерген отчёт сынан ончер почылтын. Мо нерген тудо каласкалымыже фоторепортажыштем ончалза.
