Мутшо Василий Регеж-Гороховын.
Семже Владислав Куприяновын.
«Моско мари» этно-эстраде хор мура.
Кает-кает – мучашдыме чодыра,
Тÿжем йÿк дене тудо шергылтеш:
Йÿд-кече кайык еш шÿшка, мура…
Йомакышке верештмыла чучеш!
Тиде Марий Эл –
Шочмо-кушмо вел.
Чодырам эртет – мучашдыме пасу:
Шöртнялге шурно пырдыжла коеш,
Йырваш тугай пÿртÿс, тугай асу…
Йомакышке верештмыла чучеш!
Тиде Марий Эл –
Шочмо-кушмо вел.
Тора гычак волгалт шога ола,
Пурет гын, тушто кумылет нöлтеш:
Тугай ужарге, кеч йошкар ойлат…
Йомакышке верештмыла чучеш!
Тиде Марий Эл –
Шочмо-кушмо вел.