Тений кӧ пенсийыш лектеш?

2021 ий – пенсий ийготым кугемдымашке куснымо жапын кумшо ийже. Тудо 2019 ийыште тӱҥалын да 2028 ий марте шуйна.

2021 ийын кокымшо пелыштыже ондакысе законодательстве почеш 2019 да 2020 ийлаште лекшашлык еҥ-влак пенсионер радамыш ушнат. Тиде – 1965 ийын икымше пелыштыже шочшо ӱдырамаш-влак (56,5 ияш-влак) да 1960 ийын икымше пелыштыже шочшо пӧръеҥ-влак (61,5 ияш-влак). 2021 ийыште шоҥгылык шотышто страховой пенсийым налаш манын, 12 ий деч шагал огыл стаж да 21 деч шагал огыл пенсионный коэффициент лийшаш улыт.

Тыгак 2021 ийын кокымшо пелыштыже 2020 ийын икымше пелыштыже специальный стажым шуктышо да 21 деч шагал огыл пенсионный коэффициентым погышо врач, туныктышо да артиствлак лектын кертыт.

37 ий деч шагал огыл стажан ӱдырамаш да 42 ий деч шагал огыл стажан пӧръеҥ-влак пенсийыш кок ий ондак лектын кертыт, но ӱдырамашын 55 ийым, пӧръеҥын 60 ийым темымышт деч ончыч огыл.

Кум да ныл йочан ӱдырамаш-влакынат 2021 ийыште пенсийыш ончылгоч лекташ правашт уло. Ӱдырамашын кум йочаже уло гын, тудо 57 ийым шуктымеке пенсийыш кая, ныл йоча гын – 56 ияш.

2021 ийыште пенсий деч ончычсо ийготан еҥын пашаш пураш йӧнжӧ уке гын, пенсийыш кок ийлан ондакрак лектын кертеш.