Туныктышо керек-кунамат шке тунемшыжлан пример лийшаш. Спорт велым примерым ончыкта гын, тиде поснак кӱкшын аклалтеш. Лач ты амал дене 21 сентябрьыште Морко районышто «Тазалык» спартакиаде да «Нацийын кроссшо – 2024» эртаралтыч. Тушко кажне школ гыч ушненыт. Чылаже 300 наре участник ыле, нунын кокла гыч 60 нарыже – туныктымо аланысе профсоюз толкынын пашаеҥже.
«Тазалык» спартакиаде чылт пайремла эртен. Тудым Морко район вуйлатышын алмаштышыже А.М.Тихонова да районысо профсоюз ушем вуйлатыше В.С.Фёдоров почыч. Кожлаер школын профкомжо, Морко кундемын чолга спортсменже Виталий Степанов уло таҥасымашым вӱдыш. Ӱдырамаш-влак ик меҥгым куржыныт гын, пӧръеҥ-влак – кок меҥгым. Кыдалаш школ-влак коклаште Арын школын командыже сеҥышыш лектын. 2-шо вер дене Морко посёлкысо 2-шо номеран школ палемдалтын, 3-шо вер дене – Коркатово лицей. Тыгак кугу чолгалыкым Октябрьский, Морко посёлкысо 6-шо ден 1-ше номеран, Унчо школ-влак ончыктеныт. А тӱҥ школ-влак коклаште Купсола школ сеҥыше лийын. 2-шо вер дене Шӱргыял, 3-шо вер дене Кожлаер школ палемдалтыныт. Шордӱр школат кугу писылыкым ончыктен.
Елена Григорьева, Морко районысо туныктымо аланысе профсоюз ушемын президиумжын еҥже.
Снимкыште: Морко районышто эртаралтше «Тазалык» спартакиадыш ушнышо чолга спортсмен-влак.
