Таза лияш манын…

Телым черланаш огыл манын, лудшына-влак мом ыштат?

 Лилия Петухова, Морко район:

– Теле – тугай пагыт, кунам да кушто черланыметым отат пале, шукыж годым шижынат от шукто. Йолем кылма, йӱштӧ южым шӱлалтем – тыманмеш логар коршташ тӱҥалеш, кокыртыш толеш. Тыгай состоянийым нимынярат ом йӧрате. Иктаж йӱштӧ клубышто лийына, вес кечынак тазалык начарештеш. Кеч изиш шкем аралаш манын, кеч-кунамат кеч-кушкат пеленем изи термосеш шудо чайым налаш тыршем. Мӧҥгӧ толмеке, мӱйым, лимоным, имбирьым пыштен, шокшо чайым йӱам. Чылт черланемак гын, вӱдым, пӧчыж, эҥыж, висвис, шалфей дене чайым шуко йӱаш тыршем. Нелырак лиеш гын, вигак врач деке каем. Шке семын эмлалташ пеш шучко.