Кодшо кечылаште Даниловмыт дене Йошкар-Оласе пачерыштышт уна лиймеке, тыште еш куан эҥер вӱдла ташлен шога манын умылышым. Вате-марий икте-весым тыманмеш умылат, кутырен келшат. Тидак огыл мо ешын рӱдыжӧ?! Ик йодышланак южгунам коктын кок тӱрлын вашештат гынат, тидыже икте-весым ешарыме веле лиеш.
Артист-влакын сӱаныштым Курыкмарий район Яндусола ялыште чӱчкыдынак порын шарналтат, тӱмыр йӱк кызытат пылышыште солна, маныт. Тунам Сергей Маринам кум автобус да икмыняр изи машина дене налаш миен. Кайыме кечын йӱр кечыгут лӧжген, а эрлашыжлан саде лавыра корно чот кылмен шинчын…
«Марина, молан фамилиетшым вашталтен отыл?» йодмылан «Почтенева шуэн вашлиялтеш» манын шыргыжале да ешарыш: «Адакшым сылнын йоҥга: «почёт, почтение». Такшым актрисылан сайын йоҥгалтше фамилий кӱлешак. Кеч тидыже марий калыкын тошто косаж дене сайжак огыл. Но Сергей гай марийым пагалыде огеш лий. Вет тӱмырым, шӱвырым ыштыше мастар-влакым парня дене шотлаш лиеш. Пачерыштат чыла мебельым шке кидше дене ыштымыжлан «респект» манме шуэш.
Тиде шкешотан мужыр кажне ийын 10 ноябрьыште сӱан кечым пайремла. Ӱстелтӧрыш верланымеке, Марина кажне гана ош фатажым чиен шинчеш. Но икана ты кечын паша верышкышт, Марий драмтеатрышке, Удмурт кугыжаныш театрын труппыжо спектакльым конден. Тыгай годым паша деч вара актёр-влак икте-весыштым порын вашлийыт да кужу жап пырля веселитлат. Ты ганат тыгак лийын. Вес эрдене Сергей ден Марина «Теҥгече могай сай кече ыле… А могай числа лийын? Ме сӱан кечым пайремленнас!» манын йывыртен воштылыныт.
Канде тӱс
Тыматле койышан рвезын ӱдырлан кузе келшымыжым рашемдаш тӧчен, «Кидмастар улмыжым паленат мо?» манын йодым. «Самырык годым ӱдыр-влак кугу капан, сӧрал сын-кунан качым, йомакысе ош имнян принцым кычалыт. Но Юмо мыланем Сергейым пӱрен. Марий тыгаяк полышкалыше, пашаче, умылен моштышо лийшаш, шонем», – ойла Марина.
Волгыдо канде шинчан озавате тыгаяк тӱсым жапла, вургемымат утларакшым тыгай тӱсаным ойыра. «Ме, курыкмарий-шамыч, Юл воктене илена, сандене ты эҥерын тӱсшым йӧратена. Марий тувырнамат тиде тӱс сылнештара, тудо мемнан чурийнам волгалтара», – умылтара М.Почтенева.
Шижым: пӧрткӧргышкат теҥыз тӱсым пуртымо. Теве пырдыжыште пароход сӱрет кумда ӱжеш. Кухньысо шкаф, чарша-шамычат волгыдо канде тӱсан улыт.й пароходым
Пачер – тиде куан!
Сергей дене эн неле да эн куанле жапше-влакым радамлышна. 1990-ше ийла тӱҥалтышыште артистын пашадаржат изи улмаш, самырык мужырын илыме вержат лийын огыл. Тылеч вара пиалан пагытым вучыман, маныт. Шукталтын вет – артист-влаклан пачерым пуэныт!
«Тунам Марина сессийыште ыле. Санкт-Петербургысо театральный сценический искусство академийыште тунемын. Тылеч вара 20 ий утла театрыште пашам ыштена. Вашке эрге-влак кушкын шуыт. Кирилл тений Йошкар-Оласе 14-ше №-ан гимназийыште 11-ше классым тунем пытарен, вузыш тунемаш шона. А Егор Национальный президент школышко коштеш, 2-шо классым пытарен, семӱзгар-влак дене шокташ тунемеш», – манеш Сергей.
«Ешыште йӧратыме пайремда могай?» – йодым нунын деч.
Даниловмыт 9 Майым эн чот аклат, сарыште лийше да тылыште тыршыше коча-кова-влакым геройлан шотлат. Ий еда У ийым Курыкмарий районышто вашлийыт, Маринан аваж деке коштыт.
Ты еш мер илыш дечат ӧрдыжеш ок код, тӱрлӧ мероприятийыште участвоватла. «Российын ечыгорныжо», «Нацийын кроссшо» таҥасымашлаште кажне гана вийыштым тергат. Ече дене саде таҥасымашке лекше участник-влаклан пуымо упш кок мешак погынен, маныт. Кажне ийын июльышто Угарман кундемыште лийше ориентирований дене ӱчашымашке (тудо палаткан лагерьыште икмыняр кече шуйна) уло еш дене лектын кудалыт.
Артист илыш
Даниловмытын чолга да пашаче кумылан улмышт нерген шуко каласкалаш лиеш. Артист сценыште модмо деч посна мастарлыкшым нӧлташ полшышо сомылым эре кычалшаш. Санденак Марина ден Сергей концертлаште выступатлат, ик жап тӱрлӧ вере туныктеныт. Кызыт Маринан сылне йӱкшым Марий Эл радиошто колына, тудо сай радиовӱдышӧ семын палыме.
Артист-влак чӱчкыдынак гастрольыш коштыт. А шочшыштым шке семын илаш, тунемаш, тӱрлӧ пашам шукташ кумылаҥден шогат. Сандене кеч-кунамат ты ешыште паша кумыл озалана. Южгунам пӧрт сомылка годымат рольым тунемыт. Варажым калык ончылно тӱрлӧ койыш-шоктышан образым чоҥат.
Мариналан пытартыш жапыште шындыме «Вий-ар-ме» рок-оперыште тӱрлӧ шӧрынан паша (тидыже артистлан кушкаш гына полша) шарналтын кодын. А Сергейын шӱм-чонешыже «Кум кечылан ик кува» спектакль гыч 40 ияш Метрийын образше лакемалтын. Самырык артист лӱмлӧ Иван Смирнов дене ик рольым модын, да ты паша лектыш шижалтын!
Марина ден Сергей сценыште йӧратыме ӱдыр ден качым «Молан вашлийым тыйым?» (Н.Дьяконов), «Оръеҥ мелна» (А.Волков) постановкылаште модыт. Пырля мурымо «Кок лумпырче», «Мыйын моторем» муро-влакат калыклан путырак келшат. Нуным артист-влаклан Надежда Тимофеева келыштарен пуэн.
Артистын илышыштыже жап шергакан. Яра пагыт лектеш гын, Даниловмыт колым кучат, пӱртӱсыштӧ каналтат, палаткым налын, чодырашке каят, родо-тукымыштлан тӱрлӧ сомылым шукташ полшат.
Мемнан рубрикына «Шӱдыр ешыш – унала» маналтеш маньымат, Марина тыгерак вашештыш: «Шкеннам шӱдырлан огына шотло, ме лач профессиональный образованиян артист улына». Туге гынат Марий Элын сулло артисткыже М.Почтенева да Марий Элын калык артистше С.Данилов шке пашашт дене шӱдыр семынак чолгыжыт – кундемыштына веле огыл, марий-влакын илыме тӱрлӧ верлаштыжат сылне йӱкышт да мастарлыкышт дене куандарат.
И.Речкинын да театрын архивше гыч налме фото-влак.