Кызыт С.Г.Чавайн лӱмеш Калыкле книгагудышто шуэн вашлиялтше книга пӧлкаште Н.Ильинан кок сӱретше дене палыме лияш йӧн уло.
Шошо шӱлышан, но тыгодымак «Заглядывая лето» лӱмдымӧ кугу радына покшелне – самырык еҥын чурийже да вуйыштыжо пеледыш вуйшӱдыш. Ты пашам ончен шогымо годым шымалыкым да куштылгылыкым шижат. Иктешлыше образыште южо еҥ ты ӱдырыштӧ Натальян Лиза ӱдыржымат шекланен шукта. А вес картиныште кужу папоротник ден модо коклаште кармывоҥго ешым ужына. Тудым сӱретче ик ганат поген огыл гынат, аяр поҥгын моторлыкшым ятыр жап ӧрдыж гыч эскерен коштын.
Ачажлан кӧра
Йошкар-Олаште илыше да ятыр жап медицине пашаеҥлан тыршыше Наталья Ильинан 100 наре пашаже погынен. Нуным шым персональный ончерыш чумырен шуктен, моло еҥ-влак дене пырлят ончыкталтыныт. Картинылажым профессионал-влакын пашашт дене иктӧр шындаш лиеш. Тудын сӱретысе еҥ-влак чонанла койыт, лимон-мандаринже, натюрмортысо чыла арвержат шинчаончылнак манын шоналтет.
Изи ӱдырлан аваже общий тетрадьым наледен. Тыге Наташа ныл ияшак сӱретлаш тӱҥалын. Школышто тунеммыж годым ӱдыр шке ачажлан рисований дене акварель чиям налаш каласен. Вет эше Наташалан стендгазетым ямдылаш кӱлын. Тунам чия-влак изи атыште лийыныт. Ачаже тунам акварель олмеш ӱян чиям (масло) налын толын. Мом ышташ? Чия киен, но Наталья туддене иктаж-мом сӱретлаш шонен пыштен. Тунам М.Врубельын «Демон сидящий» картиныжын изи копийжым ыштен. Ты пашажым тачат мӧҥгыштыжӧ арала.
А вара Н.Ильина художник Андрей Алексеев да Виктор Петров дене ты сомыллан посна тунемын.
Наталья озавате семын кухньысо сӧрал ате-влакым жапла да нунымак шке пашалаштыже ончыкта. Поснак фарфорым жапла, южыжым лӱмынак натюрмортлан келыштараш налеш.
Шонымашышке шуаш Натальялан шуко тыршаш логалеш. Теве ик сӱретыште мелнам ончыкташ манын, тудым кум гана кӱэшташыже пернен. Тыгак пӱртӱсым, поснак пеледышым йӧратымыжым умылаш лиеш. Фантазийжат поян, тидыже иктешлыше образым шочыкташ полша.
Волгыдо тӱс
Весела да волгыдо кумылжо Натальям тӱнян моторлыкшо деке утыр лишемда.
– Йокрокланыме теле кечын шӱм-чонышко ужар пӱртӱсым, сӧраллыкым пуртымо шуэш. Мылам чыла пеледыш келша, утларакше – гортензий ден роза. Могай гына пеледыш теве кызыт огеш пелед, чылажымат сӱретлыме да шарнаш кодшым ыштыме шуэш, – каласкалыш сӱретче шкенжын пашаж нерген.
– Тыгак иктаж полат воктене эртен кает, а тудын ӱмбак кече моткоч моторын да шке семын онча, тидым адак мондаш лийдымыш савыраш шоналтем. Вет уло илышна ятыр тат гыч шога, нуным сӱрет гоч шарналташ лиеш. Утларакшым Йошкар-Олам ончыктенам. Кодшо ийын ӱдырнан Санкт-Петербургысо вузыш тунемаш пурымекыже, ты оламат сӱретлаш тӱҥалынам.
Н.Ильина ик кечыштат шедеврым шочыктен кертеш. Но южгунам ик радынаж деке икмыняр гана пӧртылеш. Тӱняумылымашым кумдаҥдаш путешествий полша, манеш. Иктаж-куш миен толмо деч вара савыртен шогалтыме пашажым Наталья угыч ончалеш да тушко у шӱлышым пурта.
Тӱрлӧ шӧрынан
Ме Наталья Ильина дене книгагудышто вашлийна. Тудын нерген шуэн вашлиялтше книга пӧлкам вуйлатыше Наталья Ванюшкина палдарыш:
– Книгагудысо «Исторические посиделки» мероприятий пытартыш жапыште Наталья деч посна огешат эрте. Ме тудын дене лу ий утла палыме улына. Теве 25 майыште эртышаш вашлиймаште Наталья Ильина фарфор коллекцийже нерген каласкала. Чыла тидыже уш-акылым пудыратылаш да жапым оҥайын, пайдалын эртараш полша.
Тӱрлӧ шӧрынан еҥ семын тудлан литератур, историй, живопись оҥай улыт. Йошкар-Оласе мероприятийлашке кумылын ушна, тоштерлашке, театрлашке коштеш. А пеленже шуко палаш тыршыше йолташыже-влакым конда.
Чынжымак, усталык шӱлышан еҥ фельдшер специальностьшо дене гына серлаген огыл, тыгак библиографлан да дизайнерлан тунем лектын.
Айдемым шинчымаш пойдара гына. Санденак художник-дизайнерын картиныже-влак интерьерлан келшен толшо улыт. А южыжым лӱмынак кугум ыштен.
Наташа крючок дене пидеш. Коваже 96 ияш марте пидын. Кызыт ава тидлан Лизам туныктен. Тукым-влакын пашаштым ик гана Йошкар-Олаште Калык прикладной сымыктыш тоштерышкат луктыныт улмаш.
А эн оҥайже эше весе. Наталья рӱдоласе интеллектуал модмашлаште шке «Энштейн» командыштыже (тудым шке семынышт «Ржу, не могу» манын лӱмденыт) шке шинчымашыжым терга. Тыгай модыш Йошкар-Оласе кафелаште чӱчкыдынак эртаралтеш.
Чынак, тачысе волгыдо татым эрлалан шарнаш шоналтыман. Наталья ты книгагудышто ынде икмыняр гана ончерым чумырен. Тушко толшо-влак шке шонымашыштым сӱретчын «Отзыв книгашкыже» возен коденыт. Тудым южгунам гына кидышкыже налеш да пашалан кумылаҥеш. А такшым Наталья шеҥгеке ончалде ончыко кая, улан тунемаш тырша. Санденак тудын радыналаж дене Йошкар-Оласе ятыр тӧнежым (кафе, книгагудо…) интерьер семын сӧрастареныт.
Авторын да Н.Ильинан альбомжо гыч налме фото.