4-12 декабрьыште Таиланд королевствысе Бангкок олаште тайский бокс дене тӱнямбал чемпионат да первенстве эртеныт. Российын сборныйыштыжо Марий Элын спортсменкыже, 30 ияш Татьяна Петрова лийын да Тӱнямбал чемпионко лӱмым сулен. Тушеч Российын сборныйжо 108 медаль дене пӧртылын.
Татьяна тений апрельыште Кемерово олаште тайский бокс дене эртыше Российын чемпионатыштыже 48 кг нелытан-влак коклаште икымше гана сеҥышыш лектын. Спортсменке Российысе соревнованийлаште шуко гана призёр лийын. Российын кубокшым ныл гана да Европын чемпионатыштыже кок гана той медальым сеҥен налын.
Татьяна Звенигово район Мочалище посёлкышто шочын-кушкын. Профессийже дене ландшафтный дизайнер.
– Ача-авам таза илыш-йӱлам кучаш туныктеныт. Йоча жап годсек спортым йӧратем. Тайский бокс дене 22 ияш годым заниматлаш тӱҥалынам, туддене ынде 8 ий «келшена». Тайский бокс дене Российын сборныйжо дене 2018 ийыште Прага олаште, 2019 ийыште Минск олаште эртыше Европысо чемпионатлаште 3-шо верышке лектынам.
А тӱнямбал чемпионатыште илышыштем икымше гана таҥасенам. Чылаже тушто 11 ӱдыр кучедалынна. Чыла континент гыч сборный команде-влак толыныт. Сборныйышто 18-40 ияш, тыгак самырык да юниор-влакын составышт лийыныт. Кажне кечын 11-13 шагат гыч 22 шагат марте бой-влак шуйненыт.
Кызыт мый шке тренироватлалтам да ӱдыр-влаклан тренировко-влакым эртарем. Шем эре формышто кучыман, вет Российын чемпионатышкыже отборым эртыман. Кызытеш тайский бокс дене заниматлаш жапем уло, тазалыкем сита, сандене ончыкыжымат туддене кылым кучаш шонем, – мане Т.Петрова.