16 ноябрьыште Марий Эл Республикысе Татар тӱвыра рӱдерыште «Энҗе бөртекләре эзләп» («В поисках жемчужин») регион-влак кокласе фестиваль-конкурс эртаралтын. Марий Элысе татар-влак дене Татарстан, Чуваший, Угарман, Ульяновск, Пермь кундемла гыч уна-влак таҥасеныт. Конкурс тӱрлӧ номинаций дене эртаралтын: мурымаш, куштымаш, калык усталык, семӱзгар почеш шоктымаш.
Тылеч ончыч Татар тӱвыра рӱдерын пашаеҥже-влак Морко, Параньга, Марий Турек районлаште фольклорно-этнографический экспедицийыш лектын коштыныт. Нуно татар-влакын мондалтше да аралалт кодшо калык йӱлаштым шымленыт, татар тӱвырам аралыше уста коллектив-влакым кычалыныт. Эн уста-влак шке мастарлыкыштым Йошкар-Олаште фестиваль годым ончыктеныт.
Конкурсын Гран-прижым Чебоксар оласе «Ялкын» (вуйталтыше – Гузель Фёдорова) ансамбль налын. Жюри йомын толшо калык муро-влакым, калык семӱзгар-влак дене шоктымым кӱкшын аклен.