Тений 28 февраль гыч 6 март йотке Ӱярня арня шуйна. Могай мелнам ямдылаш гын?! Тамле кӧрган мелнам!
Мелналан кӱлыт: кок муно, ик кугу совла сакырложаш, пел изи совла шинчал да тынарак содо, 2 стакан ложаш, пеллитр шӧр да пеллитр шолтымо шокшо вӱд, 4 кугу совла нӧшмӱй.
Муно ден сакырложашым миксер дене лугыза, шӧрым ешарыза да варыза. Вара пелыжым атыш пыштыза. Ложашым ешарен, нӧшмйӱйым да кодшо вишкыдым пыштен, миксер дене лугыза.
Тӱрлӧ начинкым ышташ лиеш:
— поҥгым шоган да тёрко гоч колтымо сыр дене жаритлен пышташ;
— шылым (фаршым) шолтымо рис да жаритлыме шоган дене йӧре-варе ышташ;
— торык ден бананым пырля туржын пышташ.
Перкан лийже!