Тале финансист

Тудо илышыште пеҥгыдын шогышо, ответственный пашам шуктышо, келге шонымашан, опытан экономист да финансист. Тиде – Звенигово район Кужмарий селаште шочын-кушшо, Марий Элысе финанс министерствыште операционный пӧлкам вуйлатышын алмаштышыжлан ыштыше Валерий Георгиевич Григорьев. Кодшо ийын тудо «Лидеры России» конкурсышто шкенжым терген.

Математикылан кумылан

Валерий туныктышо ешеш шочын-кушкын. Ача-аваже Пошкырт кундем Калтаса районын шочшыжо-влак улыт, пӱрымаш нуным Марий кундемышке конден. Тыге Звенигово район Кужмарий селаште ешым чумыреныт, коктынат школышто тӱҥалтыш класслам туныктеныт. Валерий ден Денис эргыштлан пример лийыныт. Но чаманен каласыман, коктынат ош тӱня гыч каеныт.

Валерий йоча годсек математикым йӧрата. Шинчымашым келгемдаш манын, Кужмарий школышто 8-ше классым тунем пытарымеке, Звенигово оласе 2-шо №-ан школышко физике да математике классышке куснен. Нине да химий предметла дене районысо олимпиадылаште чӱчкыдын 1-ше ден 2-шо верлаш лектын.

– Ончыкыжым кӧ лийшашым изинек сайын паленам. Садак экономист але математик лиям манын шоненам. Денис шольымат мыйын семынак математикым йӧратен. Но тудо вес корно дене каен. Школ деч вара ПГТУ-што строительный факультетым тунем лектын. Кызыт Звенигово район администрацийыште ЖКХ пӧлкам вуйлата. А мый МарГУ-шко экономике факультетышке экономистлан да математиклан тунемаш пуренам. Кугурак курсышто МарГУ-со тӱнямбал кыл факультетыште лингвист-кусарышылан тунем лектынам. Англичан да немыч йылмылам палем, – мане В.Григорьев.

Паша корно – тӱрлӧ верыште

Кок дипломан специалист Звенигово район администрацийыште образований пӧлкаште программистлан тыршен, вара – Звенигово районысо электрокыл организацийыште инженер-программистлан. 2007 ийыште Марий Эл Республикысе финанс министерствышке пашаш толын.

 – Тушко программистлан пашашке нальыч. 2010 ийыште инвестиционный программе-влакым финансироватлыме отделыште тыршаш тӱҥальым, вара методологий пӧлкаш кусарышт. А 2013 ий годсек операционный пӧлкам вуйлатышын алмаштышыже улам.

Ме 5 еҥ тыршена. Республикыште нацпроект-влак кузе илышыш пурталтмым эскерем. Кажне эртыше идалыклан республикын бюджетшым кучылтмо шотышто законым ыштена.

Эртыше идалыкыште окса кушко кайыме, кушеч толмо шотышто отчётым ямдылена. Мемнан дене Республикысе единый счёт уло. Республикысе оксан учётшым, анализшым, прогнозшым ыштена. Ты пӧлка кажне кечын республикыште мыняр окса кодмым, тыгак оксам налше-влак деке шийвундо жапыштыже миен шумым эскера.

Паша пеш шуко, вет вашталтыш-влак эре пурталтыт, – ойла Валерий.

Чебоксарышке, Нижний Новгородышко…

Кодшо ийын шошым «Лидеры России» конкурсышко ушнаш кумылжо лектын. Заочный этапым сайын эртымеке, Юл кундем федеральный округысо очный этапышке (Нижний Новгородышто лийын) каяш ӱжмаш толын. Тушко тарваныме деч ончыч, мастарлыкым погаш манын, тыгаяк «Лидеры Чувашии» конкурсышто участвоватлен.

– «Лидеры России» конкурс ныл ий почела эртаралтеш. Ӱмаште очный этап 21-25 октябрьыште лийын. Тушто кеч-могай сферыште тыршыше вуйлатыше, вуйлатышын алмаштышыже-влак ушнен кертыныт. Нуно кугыжаныш управлений, бизнес да промышленность дене кылдалтыныт.

Тушто тестым решатлыме, лекцийым колыштмо, командылан шелалтын ӱчашыме. 151 участник гыч мые 64-ше верышке лектынам. Ончыкыжымат тыгай конкурслашке ушнаш кумыл уло, – ойла тудо.

Спортлан шӱман

Валерий Григорьев тыгак спортлан кумылан. Школышто тудо волейбол, футбол дене сайын модын, куштылго атлетике да ече таҥасымашлашке ушнен. Вузышто тунеммыж годым полиатлон секцийышке да шахмат кружокышко коштын. Садлан министерстве да ведомство-влак коклаште эртаралтше тӱрлӧ спартакиадышке чолган ушна.

Юлия пелашыже Марий Элым вуйлатышын администрацийыште тырша. Вате-марий 5 ияш Максим ден 2 ияш Лизам ончен куштат.

Валерий Григорьев илыш дене тӧр ошкылеш да у сеҥымашке шуаш тырша.