«Мемнан рӱдерын эртарыме ятыр мероприятийышкына Савино школ-интернатысе талантан йоча-влак чӱчкыдын толыт. Тыгак нуно мурымо, почеламутым лудмо, семӱзгар дене шоктымо шотышто тӱнямбалсе, тӱрлӧ кундемласе конкурслаште участвоватлат», — каласыш Сокыр-влакын Йошкар-Оласе организацийыштын культурно-спортивный реабилитаций рӱдерын худрукшо Марина Замкова.
Теве 10-шо классыште тунемше Юля Ожиганова (снимкыште) нерген каласаш лиеш. Тудо кодшо ий ноябрьыште Мурманскышке «Созвездие» тӱнямбал конкурс-фестивальыш миен толын. Юля кугурак группышто «Вокал» номинацийыште икымше верым сеҥен налын. Тушто ӱдыр «Рождение звезды» мурым мурен.
2017 ийыштат Юля муро конкурслаште чолган участвоватлен. Пермьышке кок гана миен. Тушто мурызо Диана Гурскаян организоватлыме «Белая трость» всероссийский фестивальыште да «Солнечная стрекоза» межрегиональный таҥасымашлаште мастарлыкшым ончыктен. Кокымшыштыжо икымше верым сулен.
Тыгак 9-ше классыште тунемше, музыкант лияш шонышо Максим Павловын (снимкыште) артист койышыж нерген каласаш лиеш. Тудо теве 20 январьыште Ленин лӱмеш тӱвыра полатыште эртаралтше «Шокто, гармонь!» концертыште гармоньым шоктен. Тылеч ончычат тыгай фестивальыште сценыш лектын.
А 2017 ийыште Максим Килемарыште эртаралтше «Благой ковчег» межрегиональный конкурс-фестивальыште мурымыж дене Гран-прим сеҥен налын.
Коктынат сайын тунемыт. Максим историйым йӧрата, тӱрлӧ нерген оҥайын каласкален мошта. А Юля классыштыже моло ӱдыр-рвезе-влаклан тунеммаште кумылын полшен шога.