Тыгай шонымаш дене 21 декабрьыште Марий Элын калык писательже Вячеслав Абукаев-Эмгак лӱмеш поро кумылым ончыктышо «Ший памаш» сылнымут фонд самырык автор-влаклан эртаралтше усталык конкурсын сеҥышыже-влакым палемден. Тыге «Эн сай журналист паша» номинацийыште «Виш чон» премий дене «Кугарня» газетын журналистше Елена Годунова ден Волжский районысо «Юл увер» газетын корреспондентше Лилия Николаева сеҥеныт. «Кинде шинчал» премий дене поэзий номинацийыште «Ямде лий» газетын пашаеҥже Христина Александрова ден самырык автор Андрей Николаев палемдалтыныт. Эн сай теле-, радиожурналист паша номинацийыште «Канде толкын» премий дене Марий Эл Радион пашаеҥже Жанна Фёдорова ойыртемалтын. «Кайыккомбо» премий дене эн сай драматургий номинацийыште Анжела-Михайлова Тимоева палемдалтын.
Ты премий дене самырык автор-влакым кок ийлан ик гана палемдат. Кажне лауреатым «Вячеслав Абукаев-Эмгак» лӱмеш шарнымаш медаль дене суапландареныт. Саламлымашке «Ший памаш» фондын учредительже Василий Владимирович Краснов лӱмын Мурманск гыч толын. Конкурс 2011 ий годсек эртаралтеш. Ты жапыште 30 утла самырык автор Вячеслав Абукаев-Эмгак лӱмеш премийын лауретше лӱмым сулен.
И.Речкинын фотожо.