Марий кундемыштына шуко изи ял уло. Кажныжын – шкешотан пӱрымашыже, эртыме корныжо. Параньга районыштат тыгай вершӧр шагал огыл. Ты гана Марий Лебляк да Руш Лебляк ялла дене палымым ыштена. Нуно икте-весышт деч тораштырак верланеныт, тӱрлӧ ял шотан илемыш пурат.
Марий Лебляк ялын эртыме корныжо
Матародо ял деч 5 меҥге тораште, Ермучаш ял воктене, Марий Лебляк верланен. Тудо кугорно деч 1,5 меҥге тораште шинча. 1966 ий 12 август гыч Матародо ял шотан илемышке пура.
Историйым шергалаш гын, XX курым тӱҥалтыш деч ончыч ял Виче губернийын Вӱрзым уездшын Ермучаш волостьышкыжо пурен улмаш. 1920-шо ийлаште ты волость составше МАО дене ушнен да эн ончыч Шернур, варажым 1924 ий гыч Марий Турек кантонжылан шотлалтын. 1931 ий гыч тудо Параньга районысо Ермучаш, 1950 ий тӱҥалтыш гыч Элпанур, 1952 ий гыч уэш Ермучаш ял шотан илемлашке пурен.
Йылмызе-влак лебляк шомакым кок ужашлан шелыт: «Лева – «Леонтий да «бляк» – посна тукымын мланде ужашыже. Тугеже тудо Лева (Леонтий) тукымын мландыжым ончыкта.
1923 ийыште Марий Леблякыште 36 суртышто 80 пӧръеҥ ден 86 ӱдырамаш иленыт. Коллективизаций жапыште ялысе калык «У саска» колхозышто пашам ыштен. Варажым 1950-1952-шо ийлаште Марий Лебляк, Павыл почиҥга, Ермучаш, Ондропсола яллаште илыше-влак Жданов лӱмеш колхозышко ушненыт. Марий Леблякысе калык варажым Ленин лӱмеш колхозышто пашам ыштен.
Кызыт Марий Леблякыште тушто ныл суртышто гына еҥ-влак илат. Ик пӧрт чоҥалтеш. Тидыжак ялын ончыкылыкшылан ӱшаным пуа. Чыланат ваш келшен, икте-весылан эҥертен илат. Кеч-могай пашам пырля рӱж ыштат.
Илыш условийлан тысе калык шукертак тунем шуын. Тышке газ пучым шупшмо огыл. Еҥ-влак пӧртым пу але электротул котёл дене ырыктат. Уремым электротул дене волгалтарыме. Корно уке сандене шыже да шошо лавыра годым ялышке пураш йӧсӧ. А телым лумым эре шӱкат.
Параньга район Элнет почиҥга ялын ӱдыржӧ Надежда Романовна Васильева ты ялышке марлан толын. Профессийже дене тудо штукатур-маляр, тыгак парикмахер. Параньга ПМК-ште кок ий штукатур-малярлан, райрӱдысӧ быткомбинатыште куд ий парикмахерлан ыштен. Варажым Матародо колхозышко куснен. Пытартыш жапыште «Акашево» чыве фабрикышке коштын. Кызыт мӧҥгыштӧ шогылтеш. Пелашыже Юрий Арсентьевич – инженер-механик. Моско олашке пашам ышташ ынде шым ий кудалыштеш. Дима ден Алексей эргыштат Москошто тыршат.
Надежда Романовна – весела, тыматле, пашаче ӱдырамаш. Сурткӧргӧ пашам вораҥдара, вольыкым онча, пакчакӧргымат чаткан куча. Йодмо почеш еҥ-влаклан шӧрым, ӱмбалым, ӱйым, торыкым ужала. Тӱрлӧ пакчасакам шында, шуко сливым, вишньым, тӱрлӧ сорт эҥыжым, шоптырым кушта. Тений гына 140 банке компотым ыштен. Телылан кажне ийын тӱрлӧ салатым ямдыла. Уста парикмахерым чӱчкыдын ӱпым пӱчкаш, кудырташ (химийым ышташ) але чиялташ йодыт.
Умбакыже — 17 декабрьысе газетыште. Кевыт