26-29 октябрьыште Марий Элыште тӱвыра памятник-влакым аралыме тӧнежлам вуйлатыше да специалист-влаклан семинар-совещаний эртаралтын. Тушко Российысе тӱвыра министерствын, Йӱдвел-касвел, Кечывалвел, Йӱдвел Кавказ да Юл кундем федеральный округла гыч еҥ-влак толыныт.
Марий Элым вуйлатыше А.Евстифеевын ойлымыж почеш, тӱвыра поянлыкым аралымаште пашам ыштышевлакын надырышт моткоч кугу, молан манаш гын тиде сомылым шуктымаш Шочмо Элым йӧратымым, калыкым да историйым пагалымым ончыкта. Республикыштына тӱвыра поянлык дене кылдалтше объект-влакым аралыме шотышто ятыр паша шукталтеш. Республикын 100 ияш лӱмгечыжлан Марий Элысе историй да архитектур памятниклам уэмден
тӧрлымӧ. Мутлан, М.Шкетан лӱмеш Марий драмтеатрыште, С.Чавайн лӱмеш Национальный книгагудышто, Т.Евсеев лӱмеш тоштерыште, И.Палантай лӱмеш музыкальный училищыште,
Волжск оласе краеведений тоштерыште, Юрино посёлкысо Шереметев замокышто да Козьмодемьянск тоштерыште олмыктымо сомыл шукталтын.
Марий Элысе тӱвыра, печать да калык-влакын пашашт шотышто министр К.Иванов палемден: кызыт республикыштына 70 наре тӱвыра памятникын чекшым рашемдыме паша шукталтеш. 54 историй да архитектур памятниклан аралыме зоным палемдыме, чылаже 343 тӱвыра поянлык объект аралалтеш.
Семинарыште памятниквлакым аралыше орган-влакын ончыкылык паша радамыштым рашемдыме, тыгак Российысе тӱвыра министерствылан нелылык-влакым решатлаш полшышо тӱрлӧ йодышым ямдылыме.