Йошкар-Олаште илыше Лилия Герасимова «Сурт орол», «Еш пушеҥге» марий тамган аралтышым тӱрла, тыглай футболкым марий тӱр дене сӧрастара.
Самырык ӱдырамаш Морко район Шлань ялыште шочын-кушкын. Шке жапыштыже Марий кугыжаныш университетыште тунеммыж годым «Марий мурсем» ансамбльын участницыже лийын. Уста еҥ чыла шотыштат уста, таклан огыл калыкыште тыге ойлат. Лилия кидпашам ышташ йӧрата. Пытартыш ийлаште марий тӱрым тӱрлаш кумылаҥын.
«Унчо кыдалаш школышто трудым туныктышо Тамара Владимировна Максимова кылай тӱр (гладь) йӧн дене тӱрлаш, пидаш да ургаш туныктен, лач тунам кидпашалан шӱмаҥынам. А марий тӱрым ковид пандемий годым икымше гана тӱрлен онченам. Авам Шлань ялысе «Акреттӱр» студийыште тырша, тудак мылам марий тамгам кузе чын тӱрлаш ончыктен. Эркын-эркын, йоҥылышым ыштедылын, шуко гана парням шуралтен, тунемын шуынам» – ойла Л.Герасимова.
Кидмастар кажне тамган мом ончыктымыжым книгалаште, Интернетыште шымлен. Икымше тӱрлеман пашаже шӱшер лийын.
«Эн ончыч схемым кагазеш сӱретленам, вара тудын почеш шӱртӧ пырчым шотлен тӱрленам. Ыштыме пашам келшен огыл гын, шӱртым рончем да угыч тӱрлем ыле. Шӱшер деч вара «Сурт орол» марий тамган аралтышым тӱрленам. Тӱр оҥай. Тамга покшелне – квадрат. Тудо пӧртым ончыкта. Суртым осал деч шуко ырес, «вынем» (воронка) аралат. «Сурт орол» пачерысе пырдыжыштем кызытат кеча. Тыгай тамган аралтышым родем-влаклан пӧлек шотеш кучыктенам. Кажне еш – тукым пушеҥгын лышташыже. Тиде пушеҥгын вожшо мыняр пеҥгыде, самырык ешыште кыл тунар виянрак лиеш. «Еш пушеҥге» тамга лачак тидым ончыкта. Тудым, поснак чон шокшем пуэн, канва куэмыш тӱрлем, — манеш Лилия.
Л.Герасимова марий тӱран подвеске-влакым ышта, тыглай вургемыш марий тӱр дене у сыным пурта, крючок дене пидаш йӧрата. Аважым ончен, кок икшывыжат кидпашалан шӱман кушкыт. «Кугурак ӱдырем крючок дене пидын мошта, тӱрым тӱрлаш тырша. Изиракшат почеш ок код. Ончыкшым мастарлыкем нӧлташ тыршаш тӱҥалам. Тӱрлеман книга закладкым ыштен ончынем, юмылукым тӱрлынем», – ойла кидмастар. 
Лилия йодмо почешат тӱрла. Мутлан, «Сурт орол» аралтышым кум-ныл кечыште ямдылен шукта. Пашаже-влакым ончен куанет, а тӱҥжӧ – марий шӱлышым шижат.