Тӱрлӧ верыш – QR-код дене

 

22 октябрьыште Марий Элыште у режим почеш илаш тӱҥалына. Ты кече деч вара рестораныш, кафеш, кочмыверыш, кинотеатрыш, филармонийыш, фитнес-рӱдерыш, бассейныш QR-код дене гына пурташ тӱҥалыт.

Тылеч посна 65 ияш да тылеч кугурак пашадыме еҥ-влаклан, тыгак коронавирус деч вакциным ыштыдыме да пытартыш куд тылзыште коронавирус дене черланыдыме еҥ-влаклан самоизоляций режимым увертарыме. Тидын шотышто Марий Элым вуйлатыше А.Евстифеев санитарно-эпидемиологический ситуаций шотышто указыш ешартышым да вашталтышым пуртен.

Указ почеш:

♦ ковидлан кӧра ямде улмо режимым 1 декабрь марте шуйымо;

♦ публичный, каныме, выставке, просветительский, рекламный да моло тӱшка мероприятийым очно эртараш чарыме;

♦ еҥ-влак маскым чийышаш да социальный дистанцийым шуктышаш улыт;

♦ физкультур ден спорт мероприятийлам зритель деч посна эртарыман;

♦ кочмыверлаште калыклан Wi-Fi дене яра пайдаланыме  йӧным кораҥдат;

♦ посна категорий еҥ-влаклан обязательный вакцинаций лиеш. Тышке торговля, моторлык салон, фитнес-клуб, кочмывер, МВЦ, общественный транспорт, образований, медицине, пашаеҥ-влаклан, тыгак социальный аралыме, ЖКХ сферылаште, каныме да бытовой услугым пуышо организацийлаште, промышленный предприятийлаште да моло вереат тыршыше еҥ-влак пурат.

ЭШЕ МОМ ЫШТАШ ЧАРЫМЕ — тидын нерген пален налаш «КУГАРНЯ» газетын 3-шо лаштыкшым шергалза. ИЛЫШ ДЕЧ ВАРАШ ИДА КОД!