24 -28 июльышто Йошкар-Олаште «Марий Эл» ий полатыште «Игры народов мира по традиционным видам боевых искусств и физической активности» тӱнямбал модмаш эртаралтын.
67 шӧртньӧ, 68 ший, 73 той медальым налын Марий Элын командыже.
Тудо Йошкар-Оласе «Марий Эл» ий полатыште муайтай (тайский бокс) кучедалмаш дене тӱҥалын. Муайтай боевой искусство тӱшкаш пурышо моло кредалмаш семынак ятыр ӱдыр-рвезылан келша. Ты спортышто шӱдӧ наре участник вийжым терген. Рингыште 50 мужыр кучедалын.
Марий Элысе Муайтай федерацийын президентше Андрей Собкон ойлымыж почеш, ты кечын таҥасымаш тӱҥ шотышто йӧратыше-влак коклаште лийын гын, 27 июльышто профессионал спортсмен-влак коклаште кредалмаш чыла шотыштат правилым шуктымо почеш эртен.
Муайтайын тӱҥ призше – ӱштӧ – верч шокшо таҥасымаш тӱнямбал модмашын ик эн ойыртемалтше кучедалмашыже лийын. Приз верч Андрей Собкон воспитанникше, студент-влак коклаште муайтай дене Российын чемпионжо, Юл да Урал кундемласе первенствын призёржо Александр Морозов рингыште Пошкырт кундемын спортсменже, Пошкырт, Татарстан, Марий Эл республикла, Киров областьын чемпионжо Ростислав Кутлуметов дене вашлийын. Кучедалмаш моткоч шокшын да чолган эртен. Ты вашпижмаште Александр Морозов ӱштын озаже лийын. Тудлан ӱштым Олег Тактаров кылден.
Изи да туш
Муайтай дене таҥасымаште Марий Эл гыч ятыр участник лийын. Шукынжо Йошкар-Оласе «Красная машина» спортклубышто шуаралтыт. Нунын коклаште Богдан Волковым палемдыде огеш лий. Рвезылан улыжат лу ий, но ты изи спортсменын вачӱмбалныже моткоч шуко сеҥымаш. Тудо Марий Элын, Чувашийын, Татарстанын, Виче кундемын да Ульяновск областьын шке ийготан-влак коклаште чемпионжо. Ты ганат Богдан ойыртемалте, икымше лие. Шкеж нерген тыгерак палдарыш:
– Мый Оршанке районысо Тошто Крешын селасе школышто тунемам. Муайтай кучдалмашыш ачам конден. Ончыч таҥасымашым онченна, вара шкежат заниматлаш кумылаҥынам. Мыйын изам тыгак ты спорт дене заниматла. Элнан тӱрлӧ олаштыже лийынам, шуко гана сеҥенам. Тидыже умбакыжат сай результатыш шуаш, заниматлаш кумылаҥда. Шке семынат мӧҥгыштӧ шуаралтам: куржталам, упражнений-шамычым ыштылам, разминкылан жапым ойырем.
Торжественно почмаш
25 июльышто тӱнямбал модмашым торжественно почмо. Йошкар-Оласе ий полат ончылно уна-влакым сылне сем да муро-влак дене вашлийме. Тыште пайрем шӱлыш озаланен, ятыр участник ден ончаш толшо погынен, 51 регион да кум эл гыч 1500 утла спортсмен толын.
Кажне модмаш нерген спорстмен-влак изирак представлений гоч палдареныт. Тыге модмашын ойыртемже да тудын правилже дене палыме лияш йӧн лийын.
Тыгак марий калыкын мурымашыже да куштымашыже, йӱлаже да тӱвыраже ончыкталтыныт, кундемысе спорт сооружений-влак дене палдареныт.
Латвич тӱрлӧ модмаш, лӱмлӧ уна
Тӱҥ кучедалмаш-влак Йошкар-Оласе «Марий Эл» ий полатыште, тыгак «Дружба» стадионышто да Медведево посёлкысо «Витязь» ФОК-ште эртаралтыныт. Палемдыман, тыгай кӱкшытан таҥасымаш элыштына икымше гана лийын. Да эше – Марий Элыште. Тидыже кундемыштына кугу кӱкшытан мероприятий-влакым эртараш чыла шотыштат йӧнан манмым ончыкта, организоватлыме сомылым сайын ыштен моштымым пеҥгыдемда.
Спортсмен-влак спортын 15 тӱрлӧ видыштыже таҥасеныт, тыгак марий калыкын сонар ӱчашымашыште вийыштым тергеныт. Тӱнямбал модмашын талисманжат марий лӱмым нумалеш. Тудо Патыр лӱман.
Тӱнямбал модмашын ик эн почётан унаже спортсмен, актёр, телевӱдышӧ, режиссёр, ММА профессионал борецше, UFC чемпион Олег Тактаров лийын. Тудо спортсмен-влаклан мастер-классым эртарен, тренер да спортсмен-шамычын тӱрлӧ йодышыштлан вашештен.
Учкур
Удмуртий Республик гыч лу еҥан команде тӱнямбал модмашке толын. Тренерышт – Евгений Юрьевич Ломаев. Нуно учкур дене заниматлат. Мутлан, нунын кокла гыч Елена Пенкина улыжат пел ий ты спортышто шуаралтеш. Туге гынат кугу кӱкшытан таҥасымашке ушнаш ӧрын огыл.
– Учкур – казак калыкын национальный модмашыже. Тушто тӱҥ шотышто йол, кид, пулвуй дене пашам ыштыман да писе лийман. Мый ончыч ече дене заниматленам, но тӱрлӧ амаллан кӧра кодаш логалын. Спортышто изинек шуаралтынам, сандене шкем у верыште терген ончаш кумыл лектын. Тыге учкурым ойыренам. Мыланем моткоч келша.
Спорт ушен
27 июльышто тӱнямбал модмашым торжественно мучашлыме. Тушто Марий Элым Вуйлатыше Ю.Зайцев да моло лӱмлӧ уна-влак лийыныт. Ты мероприятий элыштына илыше тӱрлӧ национальностян калык-влакын келшен илымыштым, патриот улмыштым, спортым йӧратымыштым пеҥгыдемден. У модмаш дене палыме лияш, ойыртемалтше вашпижмашым эскераш, кажне участникын тыршымыжым ужаш, чынжымак, куанле ыле. Садлан Юрий Викторовичын ойлымыж дене келшыдежат огеш лий, спорт – тиде вий, тудо кеч-могай пагытыштат эл ден калык-влакым уша. А спортсмен-шамычын шонымашке шуаш тыршымышт, командын икоян улмышт элнан спортшо ӱшанле кидыште улмым пеҥгыдемда! Боевой искусство – тале да виян, элнан чын патриотшо-шамычым куштымаште моткоч кугу надыран. Спортсмен-шамычлан у сеҥымашым да у кӱкшытым тыланем!
Авторын да Марий Элысе Спорт да туризм министерствын сайтше гыч налме фото-.