Йошкар-Олаште Ийготыш шудымо йоча-влак да нунын праваштым аралыме шотышто Правительственный комиссийын заседанийже лийын. Тудым Марий Эл Правительстве Председательын алмаштышыже К.Иванов вӱден.
Тушто молодёжь коклаште ышталтше осал пашам чактарыме, ийготыш шудымо-влак шотышто виешлымаш лийме годым реабилитацийым эртарыме, тыгак уда еш-влакым ондакак пален налме йодышлам тарватыме.
Константин Ивановын палемдымыж почеш, профилактике годым кызытсе жаплан келшыше йӧным кучылтман, лӱдыкшӧ тӱшкаш пурышо йоча-шамычлан кугу тӱткышым ойырыман, директор-влакым школышто мо ышталтмылан мутым кучаш шогалтыман.
Образований да науко министр Лариса Ревуцкаян ойлымыж почеш, образований тӧнежлаште осал пашам шагалемдымылан виктаралтше социально-психологический тестированийым эртарат.
– Лӱдыкшӧ группыш логалше кажне икшыве дене посна мероприятийым да тестированийым ыштыман. Нуным тыгак посна терген шогыман да учётыш налман. Тылеч посна ме школ директор-влаклан премийым налаш у критерий-влакым ямдыленна. Тиде кугу паша, но тиде кызытсе кӱштымашла дене келшен толеш да жап тыге йодеш, – каласен Лариса Ревуцкая.
Заседанийыште палемденыт: ийготыш шудымо йоча-влакым мер да пайдале пашашке утыр ушаш, «Движение Первых» толкынышко пурташ, личностьым вияҥдаш полшышо моло йӧным кычалаш кӱлеш.
Тыгак ийготыш шудымо-влакын половой воспитанийышт шотышто тунемше да ача-авашт дене мутланаш, ача да ава семын мутым кучымо да ешыште ӧкымлымӧ шотышто родительский погынымашым эртараш палемденыт.