Тӱням порыракым ышта

Артур Будич дене шукерте огыл палыме лийынам. Тудо поро кумылжо, еҥ-влаклан полшаш ямде улмыж дене ӧрыктарен, кызытсе жапыште тыгай самырык еҥ-влакым шуэн вашлият. Артур – Молодёжка ОНФ командын Марий Элысе координаторжо.

Рвезе Волжск олаште шочын. Школ деч вара, военный ляш шонен, МЧС-ын гражданский защите академийышкыже тунемаш пурен. Но илыш корно вес семын савыралын, да Артур МарГУ-со экономике факультетшын выпускникше лийын.

Университетыште ик ий тунеммеке, уэш военный сферыште шке вием терген ончаш шоненам. Но пел ий гыч мый раш умыленам: шочмо кундемыштак кодам умбакыже тыштак тунемаш тӱҥалам, – манеш рвезе. – Университетыште ятыр йолташым муынам. Усталык шӱлышан мероприятийлаш кумылын ушненам, спорт да мер пашаште шкем чолган ончыктенам. Студент илышыш вуйге шуҥгалтынам: чӱчкыдын сценыште выступатленам, сценарийым возенам, постановкылам шынденам, тӱрлӧ форумышто участвоватленам, порылыкым ончыктымо пашаш ушненам. Студент жапыштак Молодёжка ОНФ командын еҥже лийынам. 2018 ийыште Молодёжка ОНФ «Новые территории» самырык-влаклан форумым эртарен. Мыланемат тушко ушнаш темленыт. Лач форум годым тиде командын пашаж дене палыме лийынам.

Тылеч вара А.Будич Молодёжка ОНФ команде дене пырля акцийлаш да мероприятийлаш ушнен. А 2020 ийыште тудлан командын эше ик мероприятийыштыже, «Рубеж» форумыш ушнаш темленыт. Тиде форум рвезын илышыжым йӧршеш вес могырыш савыралын, илыш умылымашыжым вашталтен манаш лиеш. Тушто Артур Молодёжка ОНФ командын Российын тӱрлӧ лукыштыжо илыше ятыр еҥже дене палыме лийын, шукышт дене кызытат сай йолташ улыт. А ӱмаште январьыште Артурлан Молодёжка ОНФ-ын Марий Элысе координаторжо лияш ӱшаненыт.

Ик ий жапыште мо гына лийын огыл. Командышкына ятыр чулым да чолга ӱдыр-рвезе-влак ушненыт, ик кугу еш гай улына. Ме вашталтышым вучен огына шинче, мо кӱлешым шке вашталтена да еҥ-влаклан полышым пуаш эре ямде улына. «Кушто полышым вучат, тушто улына» акцийлан келшышын, мутлан чрезвычайный ситуций лийме верлаште пашам ыштена. Ӱмаште республикысе чодыра пожарым йӧрташ полшенна. Идалык мучко МЧС-ыште добровольный утарыше лияш тунемынна. Чылажым каласенат кода шок лий, – манеш чолга рвезе.

Молодёжка ОНФ Марий Элысе командыште эн чулым да чолга коклаште – 25 еҥ. Чумыр командым шотлен нала шок лий, 100 наре ӱдыр-рвезе погына. Команде дене изарня еда погынат. Эртыше мероприятий нерген кутырат, йоҥылышым шотыш налын, каҥашат, ыштышаш пашалан планым чоҥат.

– Командын ужашыже лияш мыланем – ик кугу еш семын ваш полшен илаш, кеч-могай неле жапыште икте-весылан эҥерташ, нелылыкым сеҥаш. Эн лишыл еҥем, авам, мый денем кугешна. Тидыже эн тӱҥ, – ойла рвезе.

Яра жапыште Артур йолташыже-влак дене вашлиеш. Фотографий-влакым ышташ йӧрата, куржталеш. Ончыкыжым вес элыште лияш, тӱрлӧ калык, нунын тӱвырашт да йӱлашт дене палыме лияш шона.