Чолга марий ӱдыр Анастасия Топаева Кужэҥер район Шӱдымарий ялеш шочын-кушкын. Кызыт И.С.Палантай лӱмеш тӱвыра да сымыктыш колледжыште тунемеш. Тӱрлӧ конкурсышто шкенжым терга. Шукерте огыл «Идалыкысе муро – 2021» фестивальыште мурен, ӱмаште шыжым «Ӱдырсий» конкурсышто «Семалче» номинацийыште ойыртемалтын.
Анастасиян Мураш мастарлыкше – аваж деч. Изиж годым ӱдыр туныктышо лияш шонен, но варажым мураш кумылжо эшеат вияҥын да, шке ялысе школышто индеш классым тунем пытарымек, тӱвыра да сымыктыш колледжын студенткыже лийын.
– Школышто марий йылме ден литератур уроклаш йӧратен коштынам. «Живая классика» марла лудмаш конкурсышто ик гана веле огыл шкем тергенам. Эше музык урок пеш келшен. Спорт дене кылым кучем. Ик жап спорт колледжыш тунемаш пураш шонен коштынам, – манеш А.Топаева.
Кызыт Анастасия нылымше курсышто «Хоровое народное пение» пӧлкаште шинчымашым пога. Тылеч ончыч музыкальный школыш коштын огылат, тунемаш нелырак лийын, садлан тудо уло жапшым тунеммашлан пӧлекла.
– Моло студентым ончем да «Канен кошташ жапым кузе муыт?» шонем. А ме йолташем-влак дене эрдене колледжыш толына да кас марте тушто улына, – каласкала Настя. – Мужырлаште шинчена, вара фортепиано дене шокташ каена, мураш коштына. Икманаш, чытыш да вий шуко кӱлыт, шкем чаманыде тыршыман. Преподаватель-влаклан пеш кугу таум каласынем. Нуно поро кумылан улыт, эре полшат.
«Идалыкысе муро – 2021» фестивальыште Анастасия «Чыла шулен» муро дене сценыш лектын. Тиде – ӱдырын кокымшо мурыжо. Икымшыже «Ит чарне, йӱр» маналтеш.
– Кок мурыжланат мутым Христина Александрова возен. Тудлан кугу таум каласем. Муро-влак шонаш таратыше, чонемлан лишыл улыт. Кызыт автор-влак дене эше ик мурым ямдылена, – каласкала А.Топаева.
Анастасиян яра жапше укеат. Кызыт экзаменлан ямдылалтеш. «Ончыкылыклан планым ямдылымаш уке, илышыште чыла лийын кертеш», – манеш тудо. Анастасиялан у муро-влакым, ты аланыште у сеҥымашым тыланена.