Марий Элысе налог органын пашаеҥже-влак «Кичиер» санаторийыште спецоперацийын участникше-влакын ешышт дене вашлиймашым эртареныт. Тушто нунын могай льготышт улмо нерген каласкаленыт.
СВО УЧАСТНИК-ВЛАКЛАН ПУАЛТЕШ
СВО-што улмо жаплан кусараш лийдыме пого шотышто налоглан кажне видын ик объектшылан (пӧрт, пачер, гараж) льгото:
- СВО участник-влаклан да нунын ешыштлан, 2022 ий гыч (посна категорий-влаклан РФ НК 407 ст. 9.1-9.5 п.);
- служебный обязанностьым шуктышыла колышо военнослужащий ден кугыжаныш служащий-влакын ача-аваштлан да пелашыштлан (РФ НК 407 ст. 13 п.);
СВО участник-влак, кеч-мыняр транспортышт уло гынат, транспортлан налогым тӱлымӧ деч 2021, 2022, 2023, 2024 ийлалан утаралтыт, тыгодым СВО-што могай жап гыч улмышт шотыш огеш налалт.
БОЕВОЙ ДЕЙСТВИЙЫН ВЕТЕРАНЖЕ-ШАМЫЧЛАН ЛЬГОТО:
- кусараш лийдыме пого шотышто налог деч кажне видын ик объектшылан (пачер, пачерыште пай, пӧлем, пӧрт да молат) утаралтыт;
- 200 имне вий марте куатан ик легковой автомобильлан транспорт шотышто налоглан 50 процент льгото;
- мланде налог шотышто налог вычет: мланде участке 6 сотык деч кугу огыл гын, налогым огыт тӱлыктӧ, тиддеч кугурак гын, кодшо кумдыкшылан шотлат.
Тылеч посна мобилизоватлыме еҥ-влаклан налогым, сборым тӱлымӧ жапым шуйымо: мобилизаций пытыме але уволитлалтме тылзе деч кум тылзе вара 28-ше числа марте. Тыгак пачерым але машинам ужалымылан НДФЛ-ым, транспортлан, мландылан, кусараш лийдыме погылан налогым тӱлымӧ жапым шуйымо.