Кызыт, специальный военный операций (СВО) кайыме годым, профессиональный армий, контракт почеш службо шотышто йодыш поснак пӱсын шога. Шочмо элым профессиональный военный семын аралаш шонышо еҥ Россий Обороно министерстве дене контрактым ыштен кертеш. Контрактник дене кылдалтше йодыш-влаклан вашмутым Контракт почеш военный службыш ойырен налме Йошкар-Оласе пунктым вуйлатыше П.В.Ильинов пуа.
– «О воинской обязанности и военной службе» федеральный законыш икмыняр вашталтышым пуртымо. Иктыже – контракт почеш военный службым эрташ шонышо кандидатлан ийгот шотышто чаракым кораҥдыме. 2022 ий май марте икымше контрактым 40 ияш марте еҥ гына подписатлен кертын. Тиде ийгот деч кугурак-влак коклаштат контракт почеш службым эрташ, тыгак СВО-што участвоватлаш шонышо-шамычын шукеммыштым шотыш налын, ийгот шотышто чаракым кораҥдыме.
– Тыгай еҥлан кугыжаныш могырым могай полыш ойыралтеш?
– Воинский частьыште подготовкым эртыме годым контрактниклан кажне тылзын 31 тӱжем теҥге тӱлалтеш гын, специальный задачым шуктымо годым – тылзеш 300 тӱжем теҥге марте. Марий Эл Правительстве контрактым подписатлыше еҥлан тыгак 100 тӱжем теҥгеаш выплатым ик гана тӱла. Российысе Обороно министерстве деч тыгак ик гана 195 тӱжем теҥге выплате тӱлалтеш.
– Военный операцийыште лийше контрактник-шамычлан могай соцполышым пуат?
– Тыгай еҥлан боевой действийын ветеранже статус пуалтеш. Закон почеш пенсионный обеспечений шотышто льгото уло, пенсийын 32 процентшым ешарен тӱлат. Илыме, илыме-чоҥымо, гараж кооперативыш пурымо годым ойыртемалтше правашт лиеш. Сад-пакчалан мландым налме годым тыгай еҥ черетыште ончылно шогаш тӱҥалеш. Тыгак илыме верлан тӱлымӧ роскотын 50 процентшым пӧртылтат. СВО-што улшо (лийше) военнослужащий-влакын икшывышт вузлаш конкурс деч посна тунемаш пурен кертыт. Ийлан ик гана каныме отпускым кеч-могай тылзыште налаш йӧн пуалтеш. Кеч-могай транспортлан билетым черет деч посна налаш лиеш. Тӱвыра, тыгак спорт да тазалыкым пеҥгыдемдыше тӧнежлаште услугым налме годымат ойыртемалтше права пуалтеш.
– Контрактым ышташ шонышо-влак дек могай йодмаш?
– Контрактым тӱҥ школым тунем пытарыше 18-60 ияш еҥ подписатлен кертеш. Тазалык могырым службылан йӧрымыжым медкомиссий пеҥгыдемда. Неле да поснак неле преступленийлан тылеч ончыч судитлыме еҥым огыт нал. Моло преступлений шотышто судимость «петырыме» лийшаш. Контрактым ик ийлан да утларак жаплан подписатлаш лиеш.
– Тыгай еҥлан кушко мийыман?
– Йодмашым контракт почеш военный службыш ойырен налме пунктыш але военный комиссариатыш миен возаш лиеш. Йошкар-Оласе тыгай пунктын адресше: Соловьёв урем, 36-шо №-ан пӧрт. Телефон (88362) 72-21-99.
Интернет гыч налме фото.