Суртводыжым сийлаш ида мондо!

Суртводыж-влак кажне суртышто улыт. Нуным сурткува, сурткугыза маныныт. Сурт-печым оролат, аралат. Окнасе пеледышым, вургемым, кочкышым, йоча-влакым, пырысым, пийым – чыла эскерат.

Сурткува ден сурткугыза мыланна эҥгек толмым чӱчкыдын шижтарат, но шукыж годым ме тидым умылен-тогдаен огына мошто. Мутлан, окнаште тӱзланен кушшо пеледыш кенета пеледмым чарна, лывыжга але кошка. Але суртышко вес еҥ толын кая. Сурт гыч лектеш гына, кучымо чайгорка кид гыч мучышталтын, кӱварваке камвозын, шырпын шалана. Ӱстембалне кийыше вилке але совла йоҥылыш ӱлык камвозеш.

Суртводыж йӱшӧ еҥым, аватмутым кучылтмым, йочам кырымым огеш йӧрате. Тыгай годым ӱчым шуктен кертеш.

Ме, марий калык, шукыж годым сурткугыза дене пырля сурткуважымат кычкырена. Тиде чынак. Рушлаже «волосатке» маныт. Тиде ватыже лиеш. Сурткува ныжылге, поро чонан. Тудо нигунамат торжа мутым огеш ойло, пареҥге ден шӧрым да пурам йӧрата.

Ожно палыше озавате сурт кувалан олым але шудо дене вакшышым ыштен. Тушко пидме салфеткым пыштен. Тыге сымыстараш тыршен.

Ялыште, у суртыш илаш пурымеке, эн ондак пырысым пӧртыш колтеныт. Молан? Сурткува пырыс ӱмбак шинчын пурен улмаш. А вет тидым шукын огыт пале.

Сурткугызан шольыжо уло. Тудо нигунам суртышко огеш пуро. Шольыжо вольык вӱтам орола. Суртоза шольыжлан келша гын, тудо нигунам эҥгекым огеш кондо. Ушкалат шӧрым сайын пуа, кайык-лудат лектышан лиеш, ава сӧснат игым шуко ышта.

Озаватылан вӱташке шалавуя лекташ ок йӧрӧ, тыгайлан сурткугызан шольыжо сырен кертеш. Сурткӧргыштӧ вольык, кайыккомбо шуко лектышан лийышт манын, озавате вӱтан ик лукешыже суртводыжын шольыжлан иктаж-могай сийым пышта. Тунам вольык таза лиеш, шукемеш.

А вольык черлана гын, суртводыжын шольыж деч полышым йодман. Чыла сай лиеш.

Р.СТЕПАНОВА.

Йошкар-Ола.