Суд приговорым луктын

Йошкар-Оласе городской суд 46 ияш пӧръеҥым РФ УК-н 105-ше статьяжын 1-ше ужашыже (пуштмаш) почеш титаканлан шотлен.

2023 ий 20 январьыште ондак судитлыме йӱшӧ пӧръеҥ Йошкар-Оласе Петров уремын ик пачерыштыже, ӱчашымаш лекмеке, палымыжым вуйжо гыч кӱртньӧ ӱстел йол дене лу деч шагал огыл гана перен. Тудыжо тунамак колен. Уликым шылташ манын, пӧръеҥ колышо еҥын вургемжым йӱлатен да воктен подъездысе ик пачерыш каен, тушто умбакыже аракам йӱын. Тул ылыжмым пошкудо-влак ужын шуктеныт. Судебный заседанийыште пӧръеҥ шкенжым титаканлан шотлен. Суд тудым пеҥгыде режиман исправительный колонийыште 11 ийлан эрык деч посна кодаш пунчалын.

Колышо еҥын родо лийшыже титакан еҥ деч моральный компенсаций шотеш 800 тӱжем теҥгем тӱлаш йодын, тиддене суд келшен.

Ты уголовный делам расследоватлымым Йошкар-Оласе прокуратур терген шоген.