Юл кундем федеральный округысо «ФормАРТ» стрит-арт фестивальын IV тургымышкыжо ушнаш йодмашым погат. Тений тудо Педагогын да наставникын идалыкыштлан пӧлеклалтын.
2023 ийысе фестивальын тӱҥ темыже – «Шинчымашын вийже». Юл кундем федеральный округ гыч самырык художник-влаклан тыгай теме-влак кокла гыч иктыжлан граффитим ышташ темлалтеш:
- «Мыйын туныктышем» (икымше туныктышо, кажне айдемын илышыштыже туныктышын рольжо, регионысо сулло туныктышо-влак);
- «Айдемын личный да профессиональный вияҥмаштыже наставникын рольжо»
- «Сымыктышыште туныктышын да наставникын образышт»;
- «Шинчымаш – вий» (шинчымаш – негыз да обществым ончыко виктарыше вий, интеллектуально шуаралтмаш да эрудиций – сеҥымашыш шуаш полшышо вий);
- «Образованийыште современный технологий» (ончыкылыкын школжо, ончыкылыкышто туныктымо паша);
- «Киров 650» посна номинаций, тудо олан лӱмгечыжлан пӧлеклалтын, тушко Российын вес регионжо гычат ушнен кертыт.
Фестивальын участникше-влак: 18-35 ияш профессиональный стрит-арт художник да художник-любитель-влак.
Йодмашым проектын сайтыштыже (formartpfo.ru) 30 апрель марте возыман, тыгак конкурслык пашан эскизшым ончыктыман.
Ик участник фестивальын кажне тематикыш кок йодмаш дене пуэн кертеш.
Регионышто эн сай пашан авторжо-влак Юл кундем федеральный округыш пурышо 14 регион кокла гыч кеч-кудыштыжо зданий пырдыжеш тений кеҥежым сӱретыштым ыштен кертыт. А «Киров 650» спецноминацийыште сеҥыше Киров олашет 2024 ийыште сӱретла.
Регионласе зданийлаште сӱретым ыштыме историй дене кылдалтше видео- да фотоматериал-влакым проектын сайтыштыже (formartpfo.ru) вераҥдат.
Сеҥыше-влакын лӱмышт Киров олаште 2023 ий августышто пале лиеш. 1-ше, 2-шо, 3-шо верлам налше-влак 200, 150 да 100 тӱжем теҥге кугытан грантым налыт.