Моско олаште гостехнадзор орган-влакын «Гостехнадзор России – 2025: диалог профессионалов» Всероссийский совещанийышт лийын. Тушко Марий Элысе Гостехнадзор департаментын еҥже-шамыч ушненыт.
Россий Ялозанлык министр Оксана Лут палемден, самоходный машина-влакын эксплуатацийым эртымышт годым туткар деч кораҥаш манын, инспекций-шамычлан пашам тӱткын шуктыман. Тыгак ялозанлык техникым модернизироватлыме годым тидым шотышто кучыман. Ты совещанийын ик эн тӱҥ темыже-влак: техникым регистрироватлымаш, учётым цифровизироватлымаш, электронный паспортым илышыш шыҥдарымаш, машин оза-влаклан дистанционный сервисым вияҥдымаш.
Участник-шамыч тыгак у нормативын йодмашыж шотышто каҥашеныт, вашла паша опыт дене пайлалтыныт да элнан рӱдолаштыже верланыше шуко функциян гостехнадзорын икымше рӱдержым ончал савырненыт.