Россий ФСИН-ын Марий Элысе управленийжын уголовно-исполнительный инспекцийже шукерте огыл совещанийым эртарен. Тушто тений 9 тылзыште ыштыме пашам иктешленыт. Совещанийым ты управленийын начальникше И.Третьяков вӱден.
Тений уголовно-исполнительный инспекцийын учётшо гоч Марий Элыште илыше 3200 еҥ эртен, нуным судитлыме, но эрык деч посна кодымо верлаш вераҥдыме огыл. Тиде показатель ӱмашсе гаяк кодын. Нине еҥ-влакын калыкыште шкем кузе кучымыштым 49 инспектор терга. Кажне инспектор судитлыме 44 еҥлан мутым куча, Йошкар-Олаште гын тиде показатель кугурак.
1300 еҥ условный судимость дене учётышто шоген, нунын коклаште — ийготыш шудымо 20 подростко. 330 еҥлан обязательный пашам да 443 еҥлан исправительный пашам ыштыкташ суд пунчалым луктын.
Законым пудыртымылан мут кучымо шотышто мӧҥгысӧ арестым тений шагалрак еҥлан пуымо — суд 56 тыгай пунчалым луктын. Эрык деч посна кодымо верла гыч условно-досрочно лекше 327 еҥым инспектор-влак идалык мучко тергеныт. Нунын кокла гыч иктыже, эрыкыш лекмекыже, кокымшо кечынак законым пудыртен (шолыштмаш). Но сай примерым ончыктышо еҥ-влак шукырак улыт — чын корныш шогалше 1570 еҥым учёт гыч кораҥдыме.
УФСИН вуйлатышын ойлымыж почеш, судитлыме еҥ-влак законым пудыртымылан уэш эрык деч посна кодымо верлаш ынышт логал манын, нунылан социальный полышым пуыман.
Мутлан, паша верым кычалмаште, документым оформитлымаште, медобслуживанийым налмаште, психологий могырым консультацийым пуымаште полыш утларак кӱлеш. Индеш тылзыште республикыште инспекций учётышто шогышо 700 еҥлан тыгай полышым пуымо.
Совещанийыште тыгак личный составын служебно-боевой подготовкыжо да воспитатлыме паша, тыгак судитлыме еҥ-влак дене психологический пашам виктарыме, инспекций-влакын пашашт шотышто йодыш-шамычым рашемденыт. Идалык мучаш марте ыштен шуктышаш пашам палемденыт: элгӧргӧ паша орган-влак дене пашам пырля виктарымаште кылым эшеат пеҥгыдемдаш, электронный мониторинг системе дене пайдаланымашын лектышыжым кугемдаш.