Марий Элыште Союзный элысе – Беларусьысо – тунемше-влаклан туристский слётым эртараш ямдылалтме шотышто заседанийым Ю.Зайцев эртарен.
Ты мероприятий 2007 ий годсек кажне ийын Российыште да Беларусьышто черет дене эртаралтеш. Тений турслёт 9-14 июльышто лиеш. Тушко Беларусь гыч 7 команде да Россий гыч 30 команде ушнышаш улыт, чылаже 500 наре еҥ погынышаш. Марий Элыште слётым РФ Просвещений министерствын темлымыж почеш эртарат, тидлан республикысе Образований да науко министерстве да «Роза ветров» йоча рӱдер вуйын шогат.
Образований да науко министр Л.Ревуцкаян палдарымыж почеш, «Сосновая роща» тунемме-тренироватлалтме базе «Спортивный туризм» спортын видшын йодмашыже ден правилже-влаклан келшен толеш. Тушто палаточный лагерьым, полевой кухньым вераҥдаш, тулотым ылыжташ йӧн уло. Специалист-влак ты верым слётым эртараш сай вер семын палемденыт. Слёт программыш спортивный ориентирований дене таҥасымаш-влакым, экскурсий, тӱвыра да каныме мероприятий-влакым пуртымо.
Марий Элым Вуйлатышын пресс-службыжын фотожо.