25 апрельыште М.Шкетан лӱмеш Марий национальный драмтеатр «FОLKS Сказки народов мира» постановкыш ӱжеш.
Тиде – режиссёр Степан Пектеевын у пашаже да театрыште шыҥдарыме «Шкетан YOUNG перезагрузка» проектын ик ужашыже. Ик шагат наре шуйнышо «FOLKS» спектакль самырык-влаклан, тыгак чон дене самырык кодшо-шамычлан пӧлеклалтын. Тыште оҥай сюжет линий уло, герой-влак тӱнямбалсе лагерьыш погынат. Кажныже шке йылмыж дене кутыра. Кажныже йырым-йырысе илышым шке семынже ужеш да умыла, кажныжын – шке куанже да ойгыжо… Но ме чылан ик Мландыште илена да Айдеме улына. Артист-влак шым йылме дене (англичанла, итальянла, финнла…) кутырат. Ӱшандарышт: залыште мален шинчаш жап ок лий.
Тӱҥалын чылажат ик ий ончыч. Осал черлан кӧра ондак репетицийым Zoom платформышто эртареныт, вес йылмылам тунемаш жап каен. Вара августышто чыла ужашым иктыш чумыраш тӱҥалыныт. Теве ынде ик ий эртымеке, чылажат ямде.
Спектакль кугу сценыште лиеш. Шуматкечын, 24 апрельыште, ты постановкым эн ончыч театрын йолташыже-влак (кугурак оксам тӱлен, постановкым ончаш толшо-влакым, театрлан тыгай йӧн дене полшаш кумылан-шамычым тыште тыге маныт) ончат. Нунын полышыштлан кӧра постановко ятырлан пойдаралтын. А эрлашыжым чыла еҥым пагален ӱжыт. Ум ончаш эре оҥай, поснак – самырык-влаклан. Вет «FOLKS» манмыжак самырык еҥ-шамыч манмым ончыкта.
Ирина Степанова.
В.Тумбаевын фотожо.