Волжский районысо «Москва» озанлыкыште уржа-сорлам тений лач ик тылзыште шуктеныт. Тыште кум Acros комбайн (улыжат кумыт!) пасуш шурным погаш 5 августышто лектын да 5 сентябрьыште чылажымат поген налын.
Кум комбайн
Acros-550 ден Acros-585 комбайн-влакын виян да тале улмыштым ты озанлыкыште пашаеҥ-влак шкештак ужын-шижын налыныт, вет нунын дене 10 ий наре пайдаланат.
«Пашам ышташ тӱҥалмем годым колхозыштына СК-5 22 комбайн ыле. Ынде тудым кум комбайн алмаштен шурным шиеш. 1994 ийыште озанлыкыштына 610 еҥ пашам ыштен гын, кызыт – 85 еҥ. Прозводительность шотыштат ончычсым эртен каенна. Эше мландынажат шукылан ешаралтын», – манеш Р.Григорьев.
Тидыже озанлыкым вуйлатыше Рудольф Антоновичын кызытсе жаплан келшыше техникым кучылт да пашам вораҥдарен моштымыж нерген ойла. Тиде веле мо?! Лектышыжат куандарыше. Эше иктаж куд-шым ий ончыч тыште ик гектар гыч 25 утла центнерым налыныт гын, тений ты цифр эшеат кугурак – 32,5. 1700 гектар кумдыкышто уржам, шӱльым, шожым ӱдымӧ улмаш. Шожым вольыклан пукшат гын, уржа ден шӱльым ужалат.
ТИЧМАШ материалым «Кугарня» газетыште (2022 ий 23 сентябрь) лудса.
Снимкылаште: «Москва» озанлыкын пашаеҥже-влак.
Эльвира Терентьеван фотожо-влак.
