Вишне кичке щитовидный тум эмла. Садда уло гын, ик-кок кичке дене жапын-жапын кочса.
Иман пушеҥге-влакын кичкышт бронхо да шодо чер годым пайдале. Йоча-влаклан тыгыде пӱнчӧ пӱгыльмӧ, кичке дене вареньым шолташ лиеш. Нунын ӱмбак сиропым темыза, изиш шолтыза. Тыгай варенье кокырымо годым сай.
Шукын шошым олмапум пӱчкедат. Кичкым тыгыдырак укш-влак дене пырля погыман, каструльыш оптыман, ӱмбакыже ӱйым пыштыман. Вара изишак шолтыман да шӱрыман. Мазь гайрак лиеш. Тудым вуй корштымо годым вуйвичкыжыш йыгаш пайдале. А йоча-влаклан сайын кутырен кертдыме годымышт полша. Поснак ӱдыр-влаклан пайдале, вет олмапу ӱдырамаш пушеҥгылан шотлалтеш. Мазьым ышташ 100 грамм кичкылан 200 грамм ушкал ӱйым налман.
Тополь кичке поснак пайдале. Тудо прополис гаяк виян, ятыр пӧръеҥ черым эмла. Янда кленчаш 100 грамм кичкым (тыгыде укшымат налаш лиеш) оптыман да ош аракам темыман. Тидым у тылзыште ышташ сайрак. 14 кече шинчыктыман. Вара кечылан 10-15 чӱчалтыш дене йӱман.