24 февраль – 2 март – Иммунитетым пеҥгыдемдыме арня (1 мартыште палемдалтше Иммунитетын тӱнямбал кечыже вашеш)
Иммунитет – организмнам тӱрлӧ чер да микроб деч аралыше пӱртӱс механизм. Шукыж годым тудо инфекций-влакым сеҥаш полша, но иммунный системе лушкыдо гын, тӱрлӧ чер организмым вашкен авалта. Поснак йоча, илалше еҥ да мӱшкыран ӱдырамаш-влакын иммунный системыштлан полыш кӱлеш. Тидын нерген Марий Элысе Тазалык аралтыш министерствын эмлыме-профилактике паша да лицензирований пӧлкан советникше Наталья Чегаева умылтара.
Иммунный системылан нагрузко сезонный да сезонный огыл эпидемий, тыгак стресс годым чот логалеш. Шукыж годым телым черланена: яндар южыш шагалрак лектына, кече волгыдо огеш сите, кукшо южан пӧлемыште шуко жап шинчена. Садлан тыгай пагыште витаминым йӱмӧ нерген шоналтыман.
Иммунитетым пеҥгыдемдаш манын, организмлан витамин шуко кӱлеш, садлан сайын кочмана. Туге гынат витамин ден минерал-влакым ситарыме годым мом кочмо гдеен веле серлагаш огеш лий.
Д витамин иммунитетым пеҥгыдемдаш полша. Тудо организмыште шке семынат ышталтеш, но тидлан кечыште кужу жап лийман. Садлан кечыште кужун коштмо дене пырля теҥыз колым чӱчкыдынрак кочман.
Вегетарианец да шоҥгыеҥ-влакын организмыштышт шукыж годым В12 витамин огеш сите. Тыгодым вӱр удан ышталтеш, нерве системын пашаже пужла, иммунитет лушкыдемеш. Стресс, йӱдым пашам ыштыме да удан малыме годым В тушкаш пурышо витамин организм гыч вашке кая. Садлан шыл да шӧр-торык кочкышым, отызан кушкылым да шӱрашым утларак кочман.
Магний шкем ласкан кучаш полша. Мӱшкыран улмо да азам чызе шӧр дене пукшымо, гипертоний, физический да эмоциональный нагрузко, сакыр диабет годым магний поснак чот кӱлеш. 30 процент еҥлан ты минерал огеш сите, тудо чыла орган ден системым авалта. Магний ситыдымылан кӧра иммунитет лунчырга, шӱм-вӱргорно системын пашаже пужла, вуй коршта, депрессий мартеат шукта. Магний лышташан ужар кушкылышто да ужар пакчасаскаште, пӱкшыштӧ, шӱрашыште, бананыште шуко.
Кӱртньӧ огеш сите гын, организм тӱрлӧ микроб ваштареш шоген огеш керт. Ты минерал шылыште, мокшышто, мунышто, отызан кушкылышто шуко уло.
Иммунный системын клеткыже-влак йодым чот кучылтыт, а йодын ситыдымыжлан кӧра айдеме респираторный чер (ОРЗ, ОРВИ) дене чӱчкыдын черлана, чӱчкыдын осложненийым пуа. Садлан теҥыз ковыштам, теҥыз продуктым, йодированный
шинчалым кочман.
Но
иммунитетым
кузе
пеҥгыдемдыме
шотышто
врач дене каҥашаш
кӱлеш.
Тудо ешартыш тергымашыш колтен
кертеш,
вет витаминымат айда-лийже йӱман огыл.
Идалыкын
пагытше
вашталтме дене иммунитетым
пеҥгыдемдыме
нерген поснак шоналтыман, тиде чер
талышныме ваштареш шогаш полша. Тӱрлӧ
витаминлан
поян кочкышым кочмаш – таза да пеҥгыде
иммунный
системын негызше. Тыгак вӱдым ситышын
йӱаш мондыман огыл, физический нагрузкым
пуыман, сайын малыман. Чыла тидат
иммунитетым пеҥгыдемдаш
полша.
Марий
Элысе Тазалык аралтыш министерствын
материалже почеш ямдылыме.