Кораксола тӱвыра пӧрт пеленысе «Муро кумыл» фольклор ансамбль ял калык деке «Шорыкйол мӧчӧр-влак» программе дене лектын. Ты гана шинчымаш кас ялысе 15 суртышто эртен. Мӧчӧр-влакын тошто илыш-йӱлам шуктымышт, кажне суртышко пурымо годым озаватын куштыктымыж почеш, тошто семын тавалтен-тавалтен, сугыньым пуымышт, шке тӱжвал сынышт дене чумыр ешым куандарен моштымышт чылалан пеш келшен.
Тачысе саманыште калыкын илыш умылымашыжат уэмше, манаш лиеш. Ала-кӧжӧ, мӧчӧрым пурташ огыл манын, тӱрлӧ амалым верештеш. А южо уло кумылын васликува-кугызам вученак шога: капкажат комдык почмо, пайрем чесшат ӱстел тич, озавате пӱкшымат шке кидше дене ыштен ямдыла, мӧчӧрлан кум тӱрлӧ чесым пӧлек шотеш кучыкта.
Кӧ жаплен Шорыкйол пайремым, кӧ вучен шуктен Шорыкйол мӧчӧр-влакым, тек чыланыштынат илышышт пиалан, ӱмыр ярымышт кужу, кинде-шинчал ден шийвундо перкешт тичмаш лийын шогат. Вет лач тыге ме кугезе йӱлам арален шогымашке шке надырнам пыштена. А пошкудо яллашке вес ийын Шорыкйоллан миен шуына.
Елена Григорьева, Кораксола ялысе тӱвыра пӧртым вуйлатыше.
Снимкыште: Шорыкйол мӧчӧр-влак Кораксола ял калык дене уна лийыныт, сай сугыньым пуэныт.
