Илышыште мо эн шучко? Изинек ава деч посна кодаш. Тидым Звенигово район Красногорский посёлкышто шочын-кушшо 11 ияш йыгыр ӱдыр-влак Карина ден Полина Тарасовамыт сайын умылат. Кодшо ийын авашт ӱмыр шуде илыш дене чеверласен.
Нуным Волжский район Кӱсола ялыште илыше родо-тукымышт, вате-марий Антонида Васильевна ден Владимир Кириллович Алексеевмыт, ончаш налыныт, ӱдыр-влакын сусыр чоныштым паремдат.
Пӱрымаш Кӱсолашке конден
Волжский район Кокласола ялыште шочын-кушшо Антонида Васильевнам Кӱсола ялышке 1982 ийыште марлан толын. Владимир пелашыже дене Лилия ден Лена ӱдыр-влакым ончен куштеныт. Кызыт коктынат ешаҥыныт, шочшан лийыныт. Владимир Кириллович верысе заводлаште я фрезеровщиклан, я плотниклан ыштен. Кызыт Озаҥысе ик заводышто тырша. Кидше чылалан мастар. Кӱртньымат тапта, пу дене тӱрлӧ арверым ыштен мошта. Антонида Васильевна школышто поварлан ятыр ий тырша.
Вате-марий мокточ пашаче, тыршыше улыт. Антонида Васильевна кеҥежым садпакчаште тӱрлӧ пеледышым кушта. Суртоза ӧрдыж верыш пашаш кайымекыже, сурт сомылка шукыж годым озаватылан кусна.
Кугу туткар
Кодшо ийын лийше тиде туткар Антонида Васильевнан суртышкыжо кок йыгыр икшывым, шочмо шӱжаржын уныкаже-влакым, кондаш таратен.
«Йочапӧртыш логалыт гын, кузе тушто илаш тӱҥалыт? Тиде йодыш вуйыштына пӧрдын. Ешыште кушшо кугурак акаштым ачаштын шӱжарже ончаш налын, а ме 10 ияш Карина ден Полинам мӧҥгӧ кондышна. Теве идалыкат илат. Кушкыныт. Шочмо уныкам гай йӧратем, чаманем. Мемнам ковай, кочай маныт.
Кондымеке, аваштым чӱчкыдын шарналтеныт, ойгыреныт. Кызыт ойго деч эркын лушкат. Тӱҥжӧ: тыште нунылан келша. Кажныжын – шке пӧлемже, ӱстелже, шкафше, модышыжо да моло арверже, – ойла А.Алексеева.
Карина ден Полина
Йыгыр-влак ик сынан улыт гынат, чурийвылышышт тӱрлӧ. Рушлаже нуным эше двойняшки манын ойлат. Койыш-шоктышышт денат ойыртемалтыт. Карина лӱддымӧ, виян, тале ӱдыр гын, Полина – шыма, тыматле, лыжга. Карина спортым йӧрата, писын куржталыштеш, волейболла сайын модеш. Полина кидпашам ышташ утларак кумылан.
«Ӱдыр-влак кеч-куштат, кеч-кунамат эре пырля улыт. Иктыже уке гын, весыже йомдара. Нуно пуйто икте-весышт дене ӱчашат. Мутым колыштшо, тыматле икшыве-влак кушкыт. Ӱдыр-влакым изинек пашалан кумылаҥдем. Коктынат арулыкым йӧратат, почешышт эре эрыктат. Кӱварымат мушкыт, кочкашат шолтат. Коктынат 5-ше классыште тунемыт. Карина математикым йӧрата, задаче-влакым куштылгын решатла гын, Полина руш йылмылан кумылан, – ойла А.Алексеева.
Веселан жапым эртарат
Каныш кечылаште, поснак кеҥеж жапыште, Алексеевмыт сурт йоча йӱк дене темеш. Тунам коча-кова деке уныка-влак толыт. Нуно Полина да Карина дене кугу йолташла келшат. Ийготышт дене икгайрак улыт. Пырля погынен, футболла модыт, пакчаште рӱж шӱкым кӱрыт, вӱдым шават, уремыште шӱкым эрыктат. А телым чыланат курыкышко мунчалташ вашкат. Тыге чыланат ваш келшен, ик ойыш шуын илат.
Антонида Васильевна Карина ден Полинан сай ончыкылыкышт верч тырша. Ушан-шотан, еҥлан пагалыме, пашам йӧратыше лийышт манын сайын воспитатла.
– Кызытсе куштылго огыл жапыште таза гына лияш кӱлеш. Йоча-влакым ончен куштыман, нуным йолӱмбак шогалтыман, сай профессийым пуыман. Икшывым ончаш мылам неле огыл. Кызыт ятыр еҥын пӧртышт кугу, йоҥгыдо. Коктын гына илыше вате-марий-влак йочам ашнаш налыт гын, могай сай лиеш ыле. Ончаш шонет гын, йӧн садак лектеш. Тидлан кумыл гына лийже. Тунам икшыве йочапӧртыштӧ огыл, а ешыште кушкеш ыле. Тидыже мом шога!, – иктешлен пелештыш А.Алексеева.
Поро чонан, тыматле еҥ-влак дене мутланен, нунын тыршымыштым аклен, чолгалыкыштым ужын, куаныде ом керт. Алексеевмыт вате-марий Карина ден Полиналан весела йоча пагытым пӧлеклат, уло чон шокшыштым, йӧратымашыштым пуат.