Ялыштат оласе семын илаш да пашам ышташ лиеш. Ял илышым ойырен налше-влак кызыт шагалын огытыл. Марий Турек район Сарда почиҥга ялын ӱдыржӧ Оксана Владиславовна Федорова Сардаял школышто кудымшо ий пашам ышта. Тудо директорын воспитатлыме паша шотышто алмаштышыже, тыгак тӱҥалтыш класслам, информатикым да музыкым туныкта.
Мураш йӧрата
Мураш йӧратыме кумылжо Оксанам Йошкар-Олашке И.С.Палантай лӱмеш тӱвыра да сымыктыш колледжыш вокал пӧлкаш тунемаш конден. Тыште ӱдыр тӱрлӧ конкурсыш чӱчкыдын ушнен. Астрахань олаште эртыше ик фестивальыште 3-шо вер дене палемдалтын. Дипломым налмеке, рӱдоласе кок сымыктыш школышто туныктен. Но пӱрымаш ӱдырым шочмо вершӧрыш конден.
– Таҥемлан кӧра мый ола гыч ялыш куснышым. Шкеже тудо Сардаял кундем гыч. Йошкар-Олаште паша укелан кӧра Озаҥышке каен. Мый Сардаял школышто пашам ышташ тӱҥальым. Тиде жапыштак МарГУ-шко тӱҥалтыш класслам туныктышылан тунемаш пурышым.
Южышт ялыште илаш йӧсӧ маныт. Мый тидын дене ом келше. Тыште южшат яндар, пӱртӱсшат мотор, уто йӱк-йӱан огеш солно. Иктаж-кушко каяш кӱлеш гын, машинаш шич да кудал веле! Сардаял школна у, чапле. Кызытсе илышым ончен, ялыште оласе семынак ышташ йӧн уло, вет ме чыланат ик программе дене туныктена. Интернет уло, кӱлеш оборудований ситыше. У школышкына пурет, да оласе школышто улметла веле чучеш.
Олаште тунар паша уке. Ялыште илымеке, школ паша деч вара вольык сомылым ышташ пижат. Тидын шотышто мыланем авам кугун полша,– ойла О.Фёдорова.
Тыршен туныкта
Кызыт Сардаялысе тӱҥалтыш класслаште 20 йоча тунемеш. Оксана Владиславовна кодшо ий гыч 1-ше классым вӱдаш тӱҥалын. Тушто индеш икшыве шинчымашым налеш.
– Моло классым ончалаш гын, индеш икшыве тунар шагалла огеш чуч. Тыгак музыкым 1-9-ше классла марте туныктем. Шуко жапым ме мураш ойырена. Утларакшым актовый залышке погынена.
Умбакыжымат тыршен пашам ышташ, у технологийым, у методикым тунемаш да нуным шке пашаштем кучылташ шонем, – мане О.Федорова.
Оксана Владиславовна шочмо суртыштыжо лишыл еҥже-влак дене ила. Марлан каен огыл, но ончыкылан ешым чумыраш шона.
Самырык специалист-влакым ялыште ужаш – кугу куан. Тунам ял илышыжат, школ пашажат тӱзланен толыт.