Пытартыш переписьын данныйже почеш Свердловск областьыште 13 998 марий еҥ ила. Ты кундемысе марий ял ден села-влак Арти, Ачит, Красноуфимск районлаште улыт.
Арти районышто лу уреман Изи Тавра селасе школышто гына марий йылмым туныктат, районысо моло туныктымо тӧнежыште тыгайым тетла от вашлий манын палемдыш школ директор Л.А.Иванова. Любовь Анатольевна тыгак Арти районысо марий-влакын национально-культурный автономийыштым вуйлата.
– Ме, Арти районысо марий-влак, иквереш погынен, ятыр мероприятийым эртарена. Теве 29 октябрьыште Изи Тавра школышто шочмо йылмым арален кодымылан пӧлеклалтше «йыргешке ӱстел» йыр погынышна. Ты йодыш шотышто ятыр выступленийым колыштна да лишыл жаплан ыштышаш пашам рашемдышна.
Районысо марий-влакын ик эн кугу мероприятийлан Агавайремым шотлем. Тыгак кажне ийын писатель Алексей Эрыкан лӱмеш лудмаш конкурсым эртарена, тушко изижат-кугужат ушнат.
Ончыч Изи Тавра школышто 2-4 класслаште марий йылме урок-влак лийыныт гын, кызыт – 3-шо да 4-ше класслаште. А визымше классыш коштшо ӱдыр-рвезе-шамычлан ИКМН (история и культура марийского народа) факультатив эртаралтеш. Йочасадыш коштшо йоча-шамычымат марий тӱвыралан шӱмаҥдена. Тылеч посна школыштына марий калыкын тӱвыраже, йӱлаж дене палдарыме ятыр моло мероприятий лийыт.
Такшым ача-ава-шамычлан шке икшывышт дене мӧҥгыштышт марла кутырыманак, шонем. Мемнан селаште икшывына-влак марла эше мутланат, но вес ауллаште шукыжым рушла гына ойлат, – каласкалыш Любовь Анатольевна.
Селасе тӱвыра пӧртыштат кугу паша ышталтеш. Художественный вуйлатыше Е.С.Мулюкова тиде сомылым ворандарен шога. Йочасад, школ дене пеҥгыде кылым куча, кугыеҥ-влакланат мероприятийлам ямдыла.
Любовь Анатольевна ден Елена Семёновна XII Марий калык погыныш делегат семын ушненыт. Ӱшанена, Марий кундемыш толын кайыме нунылан суапле пашаштышт вийым эшеат ешара.
Л.Иванован колтымо фотожо.