Уло тыгай профессий – шочмо элым аралаш. 23 февраль вашеш газетнам лудшо-влакым тиде профессийыште тыршыше-влак дене палдараш шонен, республикысе ик военный частьыш миен толна. Тидлан кужу корным эрташ ыш перне – Йошкар-Ола деч тораште огыл верланыше Кутузовын III степенян орденже дене палемдалтше Киевско-Житомирский ракетный дивизийын Технический ракетный базыштыже лийна. Тудым полковник Е.В.Крысов вуйлата.
Технический ракетный базын ик связистше – кугурак сержант С.Г.Волков. Тудо Кужэҥер район Кугу Лаждӱр ялын шочшыжо. Тыште 2013 ий годсек служитла.
– Изинек военный лияш кумылем лийын, – манеш С.Волков. – Кушкын шуамат, военный институтыш тунемаш пурем манын шоненам. Но школ деч вара Озаҥысе кӱшыл танковый командный училищыш пурен кертын омыл: тунам окса чӱдылык чаракым ыштен, тунемаш пураш конкурс пеш кугу ыле. Тыге школ деч вара Йошкар-Оласе Политехнический институтын (кызыт ПГТУ) студентше лийынам. Но тунем шым пытаре – армийыш кайышым. Оренбург областьыште, Казахстан воктене ик ий срочный службым эртенам.
Армий деч вара Сергей вигак тышке служитлаш толын огыл – пел ий наре гражданский манме пашам ыштен, ешыжлан окса дене полшен. Вара гына Технический ракетный базыш службым эрташ контрактым возен. Изирак сержантлан ончыч куштылго лийын огыл: у коллектив, у вер, тунем шуаш жап кӱлын.
– Шочмо-кушмо мландыште служитлаш келша. Мӧҥгем деч тораш служитлаш кайыме нерген шонен омыл. Ешыште кум эрге кушкынна, мый эн кугу улам. Садлан кок шольымлан, авамлан полшыман. Ешыштына военный корным мый гына ойырен налынам. Службо айдемым сай могырыш вашталта, шонем. Лӱддымырак, патыррак лийынам манын кертам. Пытартыш жапыште кажне тылзын манме гаяк военно-полевой выход лиеда. Связист-влак проводной кылым ыштат, экшык лектеш гын, вашке гына кораҥдат. Писе, чулым лийман, – ойла рвезе.
Командований Сергей Волковым сай специалист семын пагала. Рвезе шке дивизийыштыже веле огыл, ракетный войскаште связист-влак коклаште эртаралтше конкурслаште шкенжым терга. Шке пашам йӧратыше да шот дене шуктышо специалист семын тудым вес дивизийышкат полшаш ӱжыт.
С.Волков Йошкар-Олаште ила. Ончыкыжым ола воктене пӧртым чоҥаш шона. Спортлан шӱман, куштылго атлетике утларак келша. Садлан физподготовкым эре отличнылан сдатла. «Арена Марий Эл» манежыш кажне арнян футбол дене модаш коштеш.