8 майыште Пошкырт кундем Илиш район Красный Октябрь ялын историйыштыже икымше гана Шочмо элым аралыше-влаклан пӧлеклалтше стелым почмо.
Ялна гыч Кугу Ачамланде сарыш 41 еҥ каен, 26 еҥже сӧй пасуэш вуйым пыштен, 15 еҥ пӧртылын. Чыланыштын лӱмыштым стелеш возымо. Спискыш воинский порысым шуктышыла да СВО-што колышо 6 еҥын лӱмыштымат ончыктымо.
Район да верысе администраций, ветеран-влак совет, Афганистан,Чечня сарыште да СВО-што лийше-влак, Куктау кыдалаш школын туныктышыжо да тунемшыже-влак, Курултай депутат Ф.Р.Шайхетдинов, районысо марий-влак тудым почмаште лийыныт.
Стеле пӱтынек ял калыкын вийже, шийвундыж дене ышталтын. Тиде шукертак вучымо проект лийын, садлан калык оксам погымашке рӱж ушнен. СВО гыч Н.Р.Байбатыров 30 тӱжем оксам колтен. СВО-што вуйым пыштыше Антон Айтиевын ешыже 60 тӱжемым пуэн. Шочмо ялжым йӧратыше Ш.Гулбида акай 50 ий утла ӧрдыж кундемыште ила гынат, 10 тӱжем тенгем колтен. Л.Байбатыров, Г.Кунакбаев, В.Байбатыров, А.Андуганов да молат 5 тӱжем теҥге дене пыштеныт. Стелым И.Байбатыров, М.Юзаев, А.Янгличев, М.Байтуков чоҥеныт.
Тудым почмо деч вара изи концерт лийын. Пайремым Анач ял гыч «Ош Виче сем» калык ансамбль муро да куштымаш дене сӧрастарен. А мучаште гармонь почеш чыла погынышо: марийже, татарже, рушыжо – кандырам пунен куштеныт. Салтак кочкышым кочмо ӱстембал коклаштат муро ятыр жап солнен.
– Иктеш ушышо, келшымаш, чап пайрем, – палемден Илиш районысо «Марий ушемым» вуйлатыше Л.Сайфутдинова.
Пайрем вашеш ялысе фермер В.В.Исанов арт-объектым шке кӱшеш ыштен.
Филипп Байтуков.
Пошкырт кундем.