Килемар районын шочшыжо Роман Вознякын илыш корныжым Шочмо элым йӧратымым да патырлыкым ончыктымо пример семын палемдаш лиеш. Роман Владимирович – Патырлык орденын ныл гана кавалерже, «За отвагу» медаль дене кум гана палемдалтын. Тудо 2014 ий годсек Россий Вооруженный Вийын йотэллаште да специальный военный операций кайыме верыште задаче-влакым шуктен.
Р.Возняк Килемар посёлко деч куд меҥге тораште верланыше Шорокундыш ялыште военный ешыште шочын. Ача-аваже йотэлыште службым эртымышт годым палыме лийыныт. Нунынак корным ойырен, илышыжым Шочмо эллан служитлымылан пӧлеклен. Сирийыште, Африкысе эллаште «шокшо» точкылаште лийын.
Спорт пеҥгыде лияш туныктен
Роман изинек спортлан шӱман кушкын, боксым йӧратен. Спортын ты видше дене тӱрлӧ таҥасымашке ушнен да ончыл верыш лектын. Школ деч вара политехнический институтыш пурен, но тӱрлӧ амаллан кӧра кодашыже логалын. Варажым Донецкысе национальный университетым («Юриспруденция» специализаций) заочно тунем лектын.
2014 ий мучаш гыч Роман Возняк ДНР ден ЛНР-ыште илыше калыкым аралымаште порысым шуктен. А 2017 ий гыч ик частный военный компанийыш куснен. СВО-што штаб начальник марте кушкын.
Лӱддымӧ, виян
Наградыже-влакым Роман Возняк шке пӱжвӱдшо да вӱржӧ дене налын, манаш лиеш. Теве 2022 ий июльышто ЛНР-ысе Клиновое посёлкышто штурмовой взвод отделенийын командирже Роман Возняк автоматше дене 8 тушман салтакым пытарен, отделенийжым ончыко вӱден. Сусырген гынат, бой пытымек гына госпитальыш эвакуироватлалтын.
Марий патырын эше ик кугу подвигшым палемдыман. 2022 ий 25 ноябрьыште ЛНР-ыште Андреевка населенный пунктышто (Артемовск ола воктене), штурмовой отряд командирым жаплан – ик йӱдлан гына – алмаштен, Андреевкым националист-влак деч арален, тыгодым шке салтакше-влакым утарен коден. Тунам тушманын 60 наре салтакшым «кораҥденыт», 19 еҥым пленыш налыныт, тушманын 7 техникыжым пытареныт да 2 техникым поген налыныт.
Р.Вознякын тыгай подвигше-влак эше икмыняре. Кызыт пӧръеҥ Вооруженный Вийыште службыжым мучашлен. Туге гынат Шочмо эллан пайдам кондымым чарнен огыл.
– Тиде регионышто мый шуаралтынам. Службо деч вара республикыш пӧртылынам, тыште пайдам кондышаш улам. Кызыт «Герои Марий Эл. Талешке-влак» программыш ушненам, мер проектлаште участвоватлем. Ветеран-шамыч дене вашлиям, вет пӧръеҥ-шамыч палышаш улыт: нунын нерген огыт мондо», – ойла Роман Владимирович Марий Элыш пӧртылмыж нерген.
Службым коден, но полшымым ок чарне
Ӱмаште декабрьыште, Шочмо элым аралышын кечынже, Россий Президент Владимир Путин специальный военный операций участник-шамыч дене Кремльыште вашлийын. Тушко Роман Вознякат миен. А тений гыч Роман Владимирович – СВО ветеран-влак ассоциацийын регионысо отделенийжын председательже.
Ешыжланат жапым ойыраш ок мондо. Ончыкылык пелашыж дене Донбассыште палыме лийын, тудат – военнослужащий-влак еш гыч. Роман пелашыж дене эргым ончен куштат, рвезе хоккейлан шӱман.
Марий талешке Роман Возняк Российын у регионжо-шамычланат полша. Тудо Сеҥымашлан ӱшана, да шочмо Марий Эл Республикын волгыдо ончыкылыкшо верч тыршаш эре ямде.
Д.Речкинын фотожо-влак.