Ӱшкыж идалык – ондакысе йоҥылышым тӧрлаш келшыше жап. 2021 ийыште духовно да эмоционально «кушкаш», тыгак пашаштат кугурак должностьыш шуаш йӧн лиеш. У идалыкыште пеҥгыде койыш-шоктышан, таза капкылан йоча-влак шочыт. Садлан икшывым ышташ шонышо-влаклан келшыше идалык. 2021 ийыште шочшо йоча-влак пиалан лийыт, чылажат илышыште нунылан куштылгын пуалтеш. Тыгак тиде идалык пӧртым чоҥаш, ешым погаш келшен толеш.
ШОРЫК (21 март – 20 апрель)
Ты шӱдыр йымалне шочшо-влаклан Ӱшкыж идалык сеҥымаш-влак дене шарналт кодеш. Пашам йӧратымаш да цельыш шуаш тыршымаш арам огыт лий. Кеч-могай у шонымашда сай лектышым пуа. Тыгак оксагалтадат кӱжгемеш. Мужырдымо еҥ тений шке пиалжым муэш. Пашада илышыште шуко жапым налеш, туге гынат лишыл еҥда-влак денат лияш тыршыза. Идалыкын кокымшо пелыштыже вес кундемыш канаш каяш сай йӧн лектеш.
ПРЕЗЕ (21 апрель – 20 май)
Пиалан идалык. Тений чыла шонымыда шукталтшаш. Шуко вашталтыш лиеш, мутлан, пачерым але автомашинам налыда. Сӱретче, музыкант, поэт-писатель-влак, ала-кунам шуктымо пашаштым шарналтен да тудлан у шӱлышым пуртен, шийвундо перкем муын кертыт. Презе-влак вашталтыш деч огыт лӱд, сандене куштылгын вес аланыш куснат. Туге гынат пашаште чот кугу вашталтыш лийшаш огыл. Ешым чумыраш сай жап. Ойырлышо еҥ-влакат уэш ушнен кертыт. Тазалыклан жапым ойырыза, спорт дене заниматлыза.
ЙЫГЫР (21 май – 21 июнь)
2021 ий шуко оҥай шӧрынан да вашталтышан лияш сӧра. Пашаште сайжат, удажат лиеш, но карьер тошкалтыш дене нӧлталалташ манын, вийым пышташ кӱлеш. Тыршен пашам ыштымыланда идалык мучашыште сай пӧлекым налыда. Ешыште вашкыл пеҥгыдемеш, родо-тукым денат лишкырак лияш амал лектеш. Тыгак тений пачер йодыш рашемдалтеш. 2021 ий ешым погаш, йочам ышташ сай пагытлан шотлалтеш. Но шуко да кыртмен пашам ыштымылан кӧра тазалыклан эҥгек лийын кертеш. Садлан шкендам аралыза.
РАК (22 июнь – 22 июль)
Рак-влаклан тиде ий икшырымын да ласкан эрта. Кугу вашталтыш-влак лийшаш огытыл. Умылен-вискален моштымо койышда тыланда эре полша. Еш кокласе кыл пеҥгыдемеш. Окса йодыш куштылгын рашемдалташ тӱҥалеш. Но вес еҥлан шке шийвундыдам ида ӱшане. Тазалыклан жапым утларак ойырыза, спорт дене заниматлыза, кече режимдам шотыш кондыза.
ЛЕВ (23 июль – 23 август)
Моло ийла дене таҥастарымаште, 2021 ий ойыртемалтше лиеш. Тудо ятыр волгыдо шарнымашым кода. Шке уш-акылым, мастарлыкым вияҥден колташ ятыр йӧн лектеш. Южгунам йогыланыме кумылат лиеш. Но тыгодым шке сомылдам вес еҥлан кудалташ ида вашке. У шонымашым илышыш вигак шыҥдараш огеш кӱл. Чылажынат шке жапше лийшаш. Еш кокласе кыллан тӱткышым ойырыза, умылыдымаш да вурседылмаш-влак шукемын кертыт. Оксам чӱчкыдын арымеш пуэда. Ӱшкыжлан тыгай койыш-шоктыш огеш келше, сандене тендам «туныктен» кертеш.
ӰДЫР (24 август – 23 сентябрь)
2021 ий эртыше идалык деч пиаланрак лиеш. Шийвундо шотыштат сай могырыш вашталтышым вучыза. Шуко жап тургыжландарыше йодышлан вашмут лектеш, проблеме-влакат шулен йомыт. Неле йодыш-влак рашемдалтмылан кӧра Ӱдыр-влакын поро кумылышт утларак палдырна, сандене йолташ-влакат шукемыт. Идалык шке опыт нерген каласкалаш келшен толеш. Кӧ алят шӱм-чон пелашым муын огыл, тений тыланда тыгай йӧн пуалтеш. А ешан-влакын ваш умылымашышт кушкеш, да йӧратымашышт у вийым налеш.
ВИСА (24 сентябрь – 23 октябрь)
Профессиональный аланыште у кӱкшытыш шуыда. Чолга, чулым да весела койыш-шоктышан улмыланда кӧра коллективыште тендам эшеат чот аклаш тӱҥалыт. Йӧратымаш аланыште изирак нелылык лийын кертеш, икте-весым умылен, колышт моштымаш тиде ситуацийым куштылемда. Тиде жапым чытен лекмеке, шыжым чыла шке верышкыже шинчеш. Амалкалче-влаклан сай идалык. Нуно тений у партнёрым муыт але филиалым почыт.
СКОРПИОН (24 октябрь – 22 ноябрь)
Ӱшкыж ий шагал огыл тергымашым конда, но тидыже тендам эшеат виянракым ышта. Эн тӱҥжӧ – нелылык ончылно вуйдам ида саке. Кажне йолтошкалтышым шонен, вискален ыштыза. Уке гын пашаште да ешыште умылыдымаш лектеш. Лишыл еҥда-влаклан шукырак жапым ойырыза, ласкалыкым, поро кумылым ончыктыза. Идалык тӱҥалтышыште кугурак должностьым темлен кертыт. Документыш кидпалым пыштымыда годым тӱткӧ лийза.
ПИКШЫЗЕ (23 ноябрь – 21 декабрь)
Идалык тӱҥалтыш гычак илышыштыда шуко вашталтыш лиеш. Но кеч-могай ситуацийым те шке могырышкыда савырал кертыда. Еш да романтике шӱлышан вашлиймаш-влаклан сай пагыт. Родо-тукым дене лушкыдемше кылым пеҥгыдемдаш йӧн лектеш. Паша верыште нелылык лийын кертеш. Но лишыл жапыште кугурак пашадаран вес паша верым муыда.
ИРКАЗА (22 декабрь – 20 январь)
Те тиде идалыклан шуко планым палемденда. Туге гынат кызыт мо илышыштыда улмым аклыза. Оксагалтам кӱжгемдыме шотышто огыл, а опытым погымо нерген ондак шоныман. А окса поянлыкым кугемдаш манын, тений ятыр йӧн пуалтеш. Пелашланда ушкалаш амалым ида пу, вурседылмашке да ойырлымашке шуын кертыда.
ВӰД ЙОКТАРЫШЕ (21 январь – 18 февраль)
Ӱшкыж идалык тыланда шуко ум пален налаш йӧным пуа. Тыгак карьер тошкалтыш денат кӱзаш сай жап лиеш. Тымарте пашада ик верыште шоген гын, у шӱлышым муын, ты пашам мучашлыза. Тидыже тыланда у паша верым муаш йӧным пуа. Лишыл еҥда-влак тыланда кеч-могай пашаштат полшаш ямде улыт. Шийвундо перке пеленда эре лиеш. Идалык мучаш марте оксамат поген шуктеда.
КОЛ (19 февраль – 20 март)
Вашталтышлан поян идалык. Поснак шошым тиде палдырна. Южо еҥым кугу оксам сӧрышӧ проектыш ушнаш ӱжын кертыт. Коллеге-влак нергенат ида мондо. Пырляште веле сай кӱкшытыш шуаш лиеш. Идалыкын кокымшо пелыже икшырымын эртышаш. Изирак иктешлымашымат ышташ уто огыл. Ончыкылык нерген шоналтыза. IT-технологий да медицине аланлаште пашам ыштыше-влаклан пиал шыргыжалеш. Оксадам тиде ийыште айда-лийже ида кучылт.