Инфекций шарлымылан кöра школ илыш да тунемме сомыл чылт у сыным налын. Пытартыш кок тылзе икшыве, ача-ава да туныктышо-влаклан моткоч шкешотан лийын. Школыш коштде, шинчымашым погымо пагыт могай шонымашым луктеш?
Алевтина Окунева, Шернур посёлкысо 2-шо №-ан школышто тÿҥалтыш класслам туныктышо:
– Тÿҥалтыш класслаш коштшо-влакын тунемме идалыкышт мучашке лишемын. Мöҥгыштö шинчышыла тунемме пашам виктараш куштылго лийын огыл. Ача-ава-влакланат, тунемше-шамычланат, мыланнат… Мылам йоча-влак дене ужын кутырымо моткоч ыш сите. Пуымо материалым сайын тунемын кертын огытыл манын шоналтемат, чон коржеш. Дистанционно шинчымашым келгын пуаш ок лий, садлан эн тÿҥжым веле туныкташ логалын. Йоча-влакын эре гаджет дене шинчымыштат сай огыл, но мом ыштет, жап тыгае. Весе шотыштат нелын чучо: мöҥгыштö вет шке пашана ятыр, шочшо-влак улыт. Икымше классыш коштшо йочам дене мöҥгö пашам ышташ кÿлын, 3 ияш икшывем денат жапым эртарыман. Чытен лекна, тау.
Маргарита Крылова, Медведево, кок шочшан ава:
– Ӱдырем кокымшо классыш коштеш, эргым – визымшыш. Дистанционно тунемаш мыланна моткоч нелын чучын. Очыни, тиде технике могырым чыла йöн укелан кöра лийын. Интернет мыйын телефоныштем веле уло, тетла мöҥгылан пуалтше пашам ышташ нигушто ыле. Сандене телефон кече мучко пашам ыштен. Йоча-влак интернет дене заданийым шукташлан веле огыл, моло амал денат пайдаланат вет, эреж годым эскеренат от шукто. Тидыжат сай огыл.
Икшыве-влакын пашаштым куштылемдаш манын, мылам шканемат пырля шинчылташ логалын. Но тиде нимогай лектышым ок пу. Мылам чучеш, пуйто йоча-влак огыл, а ме, ача-ава-влак, тунемынна. Эргым, туныктышыжын темлымашыжым шотыш налде, шке ойыркала ыле: мо тудлан кÿлешан, а мо – уке. Чыла заданийым ямдылымыже шуын огыл. Садлан тудым эре «покташ» кÿлын. Ӱдыремат кече мучко тунем шинчен, ноен. Тыге тунеммаште нимо сайжымат ом уж. Йоча-влак дистанционно тунемын огыт керт. Шинчымашым пуымаште тыгай йöным илышыш пуртат манын шоналтемат, лÿдыкшын чучеш. Икшыве-влак тыге йöршеш окмак лийыт. Чоным почмемлан нелеш ида нал, чытыш пытен.
Никита Мустаев, Шернур посёлкысо 1-ше №-ан школ, выпускник:
– Кызыт ме интеренет йöн дене тунемына. Расписанийыште улшо урок-влак почеш мыланна заданий-влакым пуат. Ме нуным ямдылена да туныктышылан колтена. Темым пуат – конспектым ыштена. Южгунам видеоконференций эртаралтеш.
Мöҥгыштö тунемаш мылам келша манын ом керт. Школыш кошташ, урокышто шинчаш, йолташ-влак дене вашлияш сайрак ыле. Самоизоляций режимлан кöра тений выпускной пайремымат ок лий. Пеш жал. Садак школым пырля тунем лекше йолташ-влак дене вашлийын, икте-весым саламлаш кумыл уло.
Кызыт мый ЕГЭ-лан ямдылалтам. Руш йылме, математике, физике да обществознаний предметла дене экзаменым кучаш тÿҥалам. Озаҥ оласе ик вузыш физике да математике направлений дене тунемаш пураш шонем.