Еҥ икшывым ончен куштымеке, илен-толын, тудо, шке шочшо гае лишыл лиеш. Тӱҥжӧ – нунын дене икойыш шуын моштыман, ача-ава семынак йӧратыман, аклыман. Шернур район Аҥанур ялыште илыше вате-марий Алевтина Владимировна ден Василий Данилович Евдокимовмыт тидым моткоч сайын умылат. Вет нуно кум икшывылан ешым пӧлекленыт.
Илышын шере-кочыжо
Алевтина Владимировна – илышыште пеҥгыдын шогышо, пашаче, тале ӱдырамаш. Тудын илыш корныжым шергалмеке, ӱдырамашын ушан ойжым колыштмеке, тидым раш умылаш лиеш. Ӱдырамашлан неле-йӧсым, йӱштӧ-шокшым чытен лекташ логалын. Самырыкше годым Шернур СПТУ-што штукатур-малярлан, варажым Моско область Можайск район Горки ялысе ик училищыште кассирлан тунемын да направлений почеш Саратов олаште икмыняр жап ыштен. Но ӧрдыж кундем марий ӱдырын чонжым сымыстарен огыл. Тыге пӱрымаш шочмо Аҥанур ялышкак конден. Тыште шке ялысе рвезылан марлан лектын, кум шочшан лийын. Ялысе фермыште 13 ий презым ончен. Но илышыште ончылно мо лийшашым пален мошташ огеш лий. Ешышке кугу ойго возын: вучыдымын пелашыже ӱмыр лугыч лийын. Тыге ӱдырамаш кум шочшо дене шкетын кодын. Икшыве-влакым йол ӱмбак пеҥгыдын шогалташ манын, ятыр ий Моско, Нижний Новгород, Озаҥ олалашке штукатур-малярлан пашам ышташ кудалыштын.
Ӱшанле эҥертыш
Йоча-влакын школышто тунеммышт годым пиалешыже кокымшо гана йӧратымашым вашлийын. Казанский ял шотан илемышке пурышо Семенсола ял гыч Василий Данилович Евдокимов ӱдырамашын илышыжым пӱтынек вашталтен. Талук келшымеке, 2007 ийыште пӧръеҥ ден ӱдырамаш возалтыныт. Вате-марий, 15 ий икте-весылан ваш эҥертен, ӱшанен илат.
Василий Данилович «Казанский» совхозышто бригадирлан, варажым комплекс вуйлатышылан, Казанский школ-интернатыште завхозлан пашам ыштен. Жапыштыже тале спортсмен лийын. 10 ий совхозын футбол командыштыже модын, тыгодым эре ончыл верлашке лектыныт. Ече дене писын коштеш, волейбол, баскетбол дене сайын модеш.
Кызыт Ольга ден Анна ӱдырышт-влак Звенигово олаште, Коля эргышт ешышт дене Медведево посёлкышко илат.
Икшыве-влак – у ешыште
А.Евдокимован шӱжарже йочапӧрт гыч икшыве-влакым ончаш налын. Тидым ужын, Алевтина Владимировнанат тидлан кумылжо лектын. Ты шонымашым пелашыжлан, шочшыжо-влаклан ойлен. Икойыш шумеке, Фаяз лӱман 10 ияш татар рвезым налыныт.
«Тудым ме Советский посёлкысо интернат гыч конденна. Кызыт ты учреждений уке.
Такшым рвезе Морко посёлкышто шочын-кушкын. Писе, чулым ыле. Сандене жапше годым почешыже эре эскерен кошташ, туныкташ логалын. Ондак нелырак лийын, варажым тунемалте. Тыге койыш-шоктышыжат вашталте. Теве 26 апрельыште 24 ийым тема. Советский район Вечын техникумышто повар-кондитерлан, варажым Чебоксар олаште 3 ий сварщиклан тунеме. Мо куандара: уда койышыжо уке. Аракам огеш йӱ, тамакым огеш шупш. Шкенжым эре ласкан куча. Кызыт Йошкар-Олаште омсам ыштымаште тырша, пӧлемым айлен ила. Такшым пачерлан ме черетыште шогена. Фаяз – тыматле, мутым колыштшо рвезе. Канышлан мемнан деке толын коштеш. Йол ӱмбак шогалтымылан, чын корнышко лукмылан эре таушта. Таумутышт мом шога!», – ойла Алевтина Владимировна.
Тиде веле мо, 2012 ийыште Евдокимовмыт акаж дене шольыжым – Наталья ден Акпарсым – ешышке ончаш налыныт. Йоча-влак Морко район Кӱчыкэҥер ял гыч лийыныт, изи годсек ончычсо ача-аваштын шуко уто-сите койышыштым ужын шуктеныт. Кызыт кушкын шогалыныт, Кукнур школышто 9-ше классыште тунемыт.
«Нине икшыве-влакым августышто Йошкар-Оласе психолого-педагогический, медицине да социальный полышым пуымо «Детство» рӱдер гыч конденна. Наташалан 7 ий, Акпарслан 6 ий ыле. Изиракшым йочасадышке пуынем ыле, но вер уке, маньыч. Тыге когыньыштым Кукнур школышко ик классышке колтышым.
Йоча-влак спортлан шӱман улыт. Наташа спорт ориентирований дене заниматла, писын куржталеш. Медальже-влакат шагал огытыл. Акпарс футболла модаш йӧрата. Школысо футбол командыште модеш. Икшыве-влак мутым колыштшо улыт, эре полышкалат», – ойла Алевтина Владимировна.
Евдокимовмытын суртыштышт йоча-влак ача-аван чон шокшыштым шижын, нунын тыршымыштым аклен шогат. Вате-марий йоча-влакын волгыдо ончыкылыкыштлан эре ӱшанен илат. Нунын чылажат лийже манын, чот тыршат.
Кумданрак 23 апрельыште лекше номерыштына лудса.