26-30 январьыште Марий Элыште «Профессионалы» профессиональный мастарлыкым тергыше Российысе чемпионат толкынын регионысо этапше эртаралтеш.
Таҥасымаш-влак республикыште профессиональный шинчымашым пуышо 16 организацийыште эртаралтыт: Йошкар-Олаште, Волжск да Козьмодемьянск олалаште, тыгак Медведево ден Оршанке посёлкылаште, Звенигово район Чакмарий да Советский район Вечын селалаште.
Ийгот шот дене тӱҥ категорийыште ӱдыр-рвезе-шамыч 58 компетенцийыште да «Юниоры» категорийыште 7 компетенцийыште таҥасеныт. Чылаже регионысо этапыш 312 студент ден 35 школьник ушнен. Нунын пелен эксперт-наставник-влак лийыныт. Конкурсант-шамычын пашаштым 400 наре эксперт аклен.
– Ты чемпионат пашазе специальностьым ойырен налше, профессийыште кугу кӱкшытыш шуаш тыршыше да Шочмо эллан пайдам ышташ шонышо самырык-шамычым ушен шога. Конкурсант-влаклан чонлан келшыше пашам муаш, шке мастарлыкым шуараш да Марий Эл Республикын промышленный да экономический потенциалжым вияҥдымашке надырым пышташ йӧн пуалтын. А шке пашам сайын палыше мастар еҥ-влак регионнан экономикыжлан моткоч кӱлыт, – палемден Марий Элым Вуйлатыше Юрий Зайцев.
Ты чемпионатын партнёржо семын 150 предприятий шкенжым темлен, нуно конкурслан заданий-влакым ямдылымаште полшеныт, конкурсант-шамычын пашаштым аклаш чемпионатыш индустриальный эксперт-влакым колтеныт, тыгак предприятий-влакын еҥышт деловой программыште спикер семын выступатленыт, конкурсант-шамычым ямдылымашке ушненыт, призым пуэныт да стажировкым эртараш верым темленыт. 2026 ийыште, мутлан, регионысо этапын 75 предприятий-партнёржо чемпионатын призёржо-шамычлан стажировкым эрташышт 275 верым ойырен.
И.Речкинын фотожо.