18 февральыште Марий кугыжаныш университетысе Калыкле тӱвыра да тӱвыра кокласе коммуникаций институтышто школлаште тунемше-влаклан этнокультур предметла дене регион-влак кокласе олимпиаде эртаралтеш.
Марий Эл, Татарстан, Башкортостан республикла да Свердловск область гыч кумло наре ӱдыр-рвезе ты олимпиадыш ушнат. А таче университетын студент-волонтёржо-влак тора кундем гыч толшо-шамычым вашлийыт.
Олимпиадым пайремлын почмаш 9 шагатат 30 минутлан Кремлёвский урем, 44-ше пӧртыштӧ («П» корпус) 213-215 аудиторийыште тӱҥалеш. Вара 10 шагат гыч 13 шагат марте йоча-влак олимпиаде пашам возаш тӱҥалыт. Тиде жапыштак Марий образований институт туныктышо-влаклан семинарым эртара.
Йоча-влаклан олимпиаде кышкарыште тыгак Калыкле художественный галерейыште республикнан 100 ияш лӱмгечыжлан пӧлеклалтше «Путь длиною в век» экспозицийыште экскурсийым эртарышаш да М.Шкетан лӱмеш марий кугыжаныш драмтеатрыште «Ваня чӱчӱ» спектакльым ончыктышаш улыт.
МарГУ-н ВК-се тӱшкаж гыч налме фото.