У ий марте икмыняр кече гына кодын. Ты юзо пайрем вашеш шуко еҥ сурт-печыжым тыршенак сылнештара. Шернур район Кугу Мушко ялыште илыше Анна Степановна ден Борис Николаевич Тымбаршевмыт пошкудо-влакым лум гыч ыштыме тӱрлӧ фигур дене ятыр ий куандарат.
Кажне ий ойыртемалтше
Тыгай «лум тоштерым» Тымбаршевмыт визымше ий ыштат. Тиде сомыллан нуным эргышт шӱмаҥден.
– У ий деч ончыч пайрем кумылым лукташ манын, Йӱштӧ Кугызам да Лумӱдырым капка воктек шындаш тӱҥалынна. Вара эркын дене лум гыч ыштыме тӱрлӧ янлык ден кайык ешаралтыныт. Кодшо ийын Африка гыч янлыкым ненченна гын, тений – Кечывалвел Америка гыч. Кызыт пума, лама, шун пире, гриф кумылым нӧлтат.
Ты пашалан кок арня ончыч пижынна. Ик кечыште 1-2 фигурым ыштен кертына. Кызыт пӧрт ончылнына 20 утла янлык «илат». Теле мучко эше шукемыт.
Шукыж годым пелашем дене коктын шогылтына, коклан икшывем ден уныкам полышкалат. Эргым, мутлан, пакча гыч лумым шупшыкта, ме, вӱдым ешарен, фигурым чоҥена.
Кок кече ончыч чиялтен пытарышна. Чиялташ колерым, гуашьым кучылтына. Игече левештыме годым тӧрлатена але, кораҥден, угыч фигурым ненчена, – палдара Б.Тымбаршев.
Борис Николаевич чоҥымо пашаште тырша, пелашыже – сулен налме канышыште. Вате-марий сӱретлаш моткоч йӧратат, сандене ты паша чоныш ласкалыкым шыҥдара, кумылым нӧлта.
Нуно кум икшывым ончен куштеныт, куд уныкашт коча-кова деке каныш кечылан унала мият. Тиде амаллан кӧра Тымбаршевмыт кок тӱрлӧ курыкым ыштеныт. Кугурак эргыже пӧрт ончылно 60 ий кушшо кожым сӧрастарен, тӱрлӧ модышым сакален.
Тӱрлӧ кундем гыч толыт
Ты сылне сурт Марий Элыште кумдан палыме. Киров, Татарстан кундемла гыч уна-влак «тоштерышкышт» толыт.
– Калыклан «тоштерна» моткоч келша. Йоча-влак курыкышто мунчалтат, кугыеҥ-влак фотом ыштат. Кажне гана тений могай вашталтыш, могай теме лиеш манын йодыт, – мане Борис Николаевич.
Кеч шошым ты сылне лум фигур-влак шулен пытат, тиде шӱлыкан кумылым огеш лук. Мӧҥгешла, вес ийлан вер лектеш, у шонымаш-влак шочыт.
У ий пайремым вате-марий икшыве да уныка-влак дене вашлияш шонат. Чылан пырля погынат гын, латкумытын лийыт. Ӱстел коклаште кочмаш-йӱмашым эртарымек, курыкыш мунчалташ лектыт.
