Роспотребнадзорын Марий Элысе управленийжын палдарымыж почеш, Йошкар-Олаште илыше ик еҥлан пудий боррелиоз чер пижын.
Пӧръеҥын палдарымыж почеш, пудий тудлан Медведево районысо чодыраште пурен. Но пӧръеҥ пудийым тергаш пуэн огыл, чер шкеж нерген палдараш тӱҥалмеке гына медполышым йодын миен.
Пудий боррелиоз годым вуй да чогашыл корштат, вийдымылык шижалтеш, коваште йошкарга. Тидыже, пудий пурымеке, 2-3 арня гыч палдырна.
12 майысе данный почеш, республикысе медорганизацийлаш 528 еҥ полышым йодын миен, нунын коклаште – 15 йоча.
Роспотребнадзорын Марий Элысе управленийжын архивше гыч налме фото.