1944 ий 12 майыште Крымысе стратегический наступательный операций годым Йошкар Армий Крымым фашист деч тӱрыснек утарен. Нацист-влак ты кундемын пелотрожым «Готенланд» колонийыш савыраш, тушко немыч-влакым илаш пурташ, а верысе калыкым пытараш шонен пыштеныт. Но Йошкар Армий ты шонымашлан вияҥаш пуэн огыл да 8 апрельыште тушманым пытараш наступательный операцийым тӱҥалын. Тудлан Совет Ушемын маршалже Александр Василевский вуйын шоген. Тылзе жапыште виян кредалмаш годым Йошкар Армий тушманын 200 тӱжем утла еҥан группировкыжым кырен шалалтен. Апрельыште Джанкой, Керчь, Евпаторий, Симферополь, Феодосий, Бахчисарай, Алушта да Ялта ола-влакым утареныт гын, 9 майыште – Севастопольым.