Эртыше каныш кечын Марий Элыште «Шанче шуматкече» эртаралтын. Йошкар-Ола, Медведево да Курыкмарий районла гыч 100 наре школьник шанче тӱняште лийыныт.
МарГУ-со экономический факультетыште ӱдыр-рвезе-шамычлан «Анализ в бизнесе» интерактивный модмашым ямдыленыт. Цифровой технологий-влак факультетыште ончыкылык разработчик, аналитик да инженер-шамычым ямдылымаште секрет-влак дене палдареныт да бизнес-модыш дене модыктеныт.
ПГТУ-со Чодырасе машина-влак эксплуатаций да конструирований секторышто школьник-шамычым чодыра отрасльысе кызытсе жаплан келыштарыме технологий-влак ӧрыктареныт. Ландшафтный дизайн дене проектирований лабораторийыште кажныже архитектор лийын ончен. А Лесосеменоводство лабораторийыште участник-шамычлан кушкыл ден микроорганизм-влакым микроскоп дене шымлаш йӧн пуалтын.
Марий Элысе Образований да науко министерствын сайтше гыч налме фото.