7-8 февральыште Науко фестиваль годым Марий Элыште Йылмым, литературым да историйым научнын шымлыше В.М.Васильев лӱмеш Марий институтышто (МарНИИЯЛИ) «Современное состояние и перспективы развития гуманитарных наук» шанче сессий эртаралтын. Тушто тӱрлӧ аланысе шанчыеҥ-влак кодшо ийысе паша лектышышт дене палдареныт да ончыкылык план шотышто каҥашеныт.
7 февральыште институтышто филологий, междисциплинарный шымлыме лабораторий, историй, археологий, этнологий, социологий дене шагат-влакым эртарыме. Тушто учёный-влак докладым лудыныт, паша лектышыштым палемденыт, лекше нелылыкым каласен коденыт. Сессийым филологий шагат дене почмо, ятыр темым нӧлталме. Мутлан, марий йылмыште соматический лексикым, марий модышлаште ойыртемалтше мут-влакым кучылтмо, тыгак марий калыкын книгаже, возыктышыжо нергенат каласен кодымо.
8 февральыште институтышто тыршыше шанчызе-влакым шокшын саламленыт, почётан кагаз ден таумутым кучыктеныт. Тушто кодшо ийысе паша лектыш дене палдареныт, «Финно-угроведение-2022» журналын презентацийже лийын.
МарНИИЯЛИ директорын сомылжым жаплан шуктышо Людмила Григорьева (фотошто ончылно пурлаште) сессий шотышто тыге каласыш:
– Республикыштына Науко фестиваль кажне ийын эртаралтеш. Тений тудо Марий кугыжаныш университетыште лие, наукын да технологийын лу ияш идалыкше дене почылтын. Педагог да наставник дене кылден, план пеҥгыдемдалтеш, чылажат гуманитарный да моло наукым вияҥдымылан пӧлеклалтеш.
Тыгай научный сессий 1960-шо ийлаште лийын. Тунам Моско пеленысе Россий науко академий гыч палыме шымлызе-влак ушненыт. Икмыняр жап тудым эртарыме огыл. 2017 ийыште сессийым уэш шке пашажым тӱҥалын.
Шанче сессийым посна площадке семын каласаш лиеш. Тушто шымлызе-влак, икте-весышт дене каҥашен, ончыкылан шымлыме пашаштым кузе виктарен толмо шотышто мутланен кертыт. 2022 ий гыч междисциплинарный шымлыме лабораторийым почмо. Российысе «Финно-угроведений» журналым умбакыже вияҥдаш шонена.
Тыгай шанче сессий моткоч кӱлешан. Ончыкылык пашаеҥ-влакым ямдылыме шотышто пӱсӧ йодыш лектеш. Поснак гуманитарный специальность дене кылдалтше шымлызе-влакым ме кызытак посна программе, план дене ямдылаш огына тӱҥал гын, икмыняр жап гыч кугу нелылыкыш логалын кертына. Тидын шотышто шанче сессий да моло научный конференций-влак полшат.
10 февральыште Науко фестиваль кышкарыште тунемше ден студент-влакым институтыш «Гуманитар наукышко ошкыл» экскурсийыш ӱжынна. Нунын дене кылна пеҥгыде лийже, паша саемже манын, тений шочмо йылмым туныктышо-влакын ассоциацийышт, Марий Элысе Тӱвыра, печать да калык-влакын пашашт шотышто министерстве, Марий шымлыше институт, «Кугарня» газет редакций, Марий национальный конгресс дене пырля «Шочмо мландем – чон пӱрымашем» регион-влак кокласе конкурсым увертаренна. Тушто паша-влакым кум номинаций дене аклаш тӱҥалына. Тений 10 декабрьыште, Марий тиште кечын, конкурсым иктешлена.